Home Politics Minister Dangui Oduber: Mehorando cuido y servicio! Cu 22 camber...

Minister Dangui Oduber: Mehorando cuido y servicio! Cu 22 camber ImSan ta converti den un hospital, un pabien na pariba di brug

SHARE

 

ORANJESTAD – Dialuna atardi Minister di Salubridad Publico sr. Dangui Oduber tabata presente na e apertura oficial caminda ImSan ta wordo converti den un hospital di 22 camber pa estadianan corto. E mandatario a expresa cu su persona semper a kere den ImSan y pesey a zorg tambe pa inverti den ImSan pa haci esaki un realidad. E mandatario ta sigura pueblo di Aruba cu e gobierno aki ta pone e ser humano central y cu hechos ta demostra esaki tambe. E vision di Gobierno tawata dirigi riba mehoracion di cuido, inversion den cuido y trata mas pashent posibel na Aruba mes. E maneho y vision di minister Dangui Oduber tawata dirigi riba haci inversionan den cuido, mehora e calidad di cuido y servicio y percura pa trata mas patient posibel na Aruba mes. 

Minister Dangui Oduber a expresa den nomber di Gobierno con contento, satisfecho y orguyoso e ta cu ImSan su vision y su desaroyonan pa cu cuido medico na Aruba. Esaki ta cuadra cu e vision di Gobierno di Aruba cu ta pa mehora e calidad di cuido na Aruba y como tambe crea un plan sostenibel pa Aruba pa asina e fondonan di AZV ta sostenibel pa den futuro. Esaki sigur ta cuadra cu vision di nos Gobierno.

E proyecto completo di ImSan ta conta cu un inversion di mas o menos 60 miyon florin. Ta importante pa pueblo di Aruba sa con e placa a wordo inverti. E expansion y renobacion di ImSan a percura pa genera 50 cupo di trabou nobo.

E proyecto den su totalidad a encera un afdeling di Radiotherapie, Esaki ta nifica cu pashentnan residencia aki na Aruba no lo mester bai mas den exterior pa esaki.

Tambe a bin cu afdeling Radiologie, aki ImSan tin tambe awor un mashin di CT Scan y 2 mashin pa haci echo.

A bin cu un Oogpolikliniek na ImSan cu ta haci posibel pa entre otro tur specialistanan di wowo aki na Aruba por traha central na ImSan cu equiponan nobo di wowo. Caminda ya caba varios operacionnan di retina a keda realiza.

ImSan tin awor su mesun sala di operacion cu e mashinannan mas avansa, e narcoze lo wordo haci na Imsan mes ya cu nan tin nan mesun anestesista. Banda di esaki ImSan tin tambe awor un Afdeling Sterilisatie van medische instrumenten cu ta percura pa tur intrumento keda limpi y sterilisa.

ImSan tin su propio Spoed Eisende Hulp cu cambernan pa ricibi adulto y tambe tin un camber special pa atende cu mucha.

Manera a yega di menciona caba anteriormente, ImSan ta traha conhuntamente cu Baptist Health International pa garantisa proceduranan medico riba nivel di calidad halto y asina percura pa ImSan ricibi acreditacion internacionalmente for di “Joint Commission International Accreditation” (JCI).

Minister Dangui Oduber ta sumamente orguyoso di a pone e fondonan disponiblel por medio di AZV pa asina cumpli cu e vision di su Ministerio y Gobierno cual ta mehora e calidad di cuido medico na Aruba. Cambionan grandi tumando lugar den salud publico na Aruba. E cambionan aki lo ta na beneficio di nos comunidad y asina Minister Dangui Oduber ta cumpli cu e promesa di trece mehoracion den cuido.

Sigur un otro logro historico pa cuido medico na Aruba. Pariba di brug tin su hospital.