Home Corte A exigi 4 aña di prison pa ilegal tira pa Guarda Costa...

A exigi 4 aña di prison pa ilegal tira pa Guarda Costa riba boto cu 10 ilegal y 287 kilo di marihuana

SHARE

 

ORANJESTAD – Corte den Promer Instancia a trata e caso penal cu Ministerio Publico a cuminsa contra e homber Venezolano R.G., kende ta wordo acusa cu riba 6 November 2020 a trafica 10 ilegal y tabatin 287 kilo di marihuana.

Aruba Native por a compronde cu durante persecusion di Guarda Costa, a tira riba e boto y a herida R.G. na su pia. Apesar cu e cacho antidroga a reacciona, no a haya droga abordo. Su siguiente dia a bay investiga riba laman y den vecindario unda a tira riba e boto a bin haya 11 jerry can yena cu marihuana.

Segun R.G. e tabata riba e boto como ilegal y e capitan di e boto nan a laga bay. El a bisa cu e no sa nada di e cargamento di droga.

Hues a mustra cu segun e relato di Guarda Costa, dia 6 November 2020, Guarda Costa bay intercepta un boto sospechoso. A duna señal pa boto para pero no para. E momento ey miembro di Guarda Costa a cuminsa tira riba e boto riba cual tabatin un cantidad di hende. A herida R.G. na pia y e momento ey tambe nan a mira hende ta tira cos den laman. A resulta cu tabatin 10 hende abordo. A usa e cacho anti droga y e cacho a reaccciona na e parti patras di boto. Su siguiente dia Guarda Costa a bay investiga riba laman riba e ruta di persecusion y vecindario. A bin haya 11 jerry can cu tabata yena cu droga. A confisca 287 kilo di marihuana. Ta sospecha e droga ta procedente di e boto cu nan a tira riba dje pa el a para.

Personal di Guarda Costa a constata cu no tabatin suficiente salbabida abordo, na tabatin luz, no tabatin GPS y tampoco anker. A conclui cu e boto no ta sigur pa navega cu asina hopi hende. R.G. a bisa cu el a paga 500 dollar pa bin Aruba pa busca un mihor forma di biba. Hues a mustra cu R.G. a declara cu nan tur ta doño di e boto door di a paga cada un 500 dollar. Segun R.G., Carlos David lo tabata esun responsabel pa cumpra e boto pa asina por use pa bin Aruba. Hues a mustra cu tin diferente persona a declara cu R.G. ta e capitan. R.G. a bisa Hues cu despues cu el a sali for di hospital pa e 2 tironan cu el a sufri na pia, e otronan a bis’e pa tuma e culpa ya cu el a wordo tira. El a bisa Hues cu nan a sera cabez pa tira culpa riba dje.

Hues a mustra cu na na April 2020 ya caba R.G. a wordo condena na 12 luna di prison pa algo similar di trece ilegal. El a wordo laga liber saca for di Aruba y a bolbe.

Fiscal ta haya legalmente proba cu R.G. a trafica droga y ilegal. Tin diferente persona cu a declaracion cu ta R.G. tabata e capitan di e boto. Ora Guarda Costa a intercepta e boto, a mira hende ta tira cosnan den laman. En total 287 kilo di marihuana a keda confisca. Na opinion di Fiscal, ta R.G. a duna orden pa tira e jerry can’s den laman. A trafica hendenan ilegal riba boto cu no ta cumpli cu exigencianan di navegacion. No tin salba bida, no tin luz, no tin GPS riba e boto. Fiscal a bisa cu traficacion di ilegal ta mina e maneho di Gobierno. El a remarca cu apenas R.G. a sali liber di KIA pa algo similar e ta bolbe cay pa ilegalidad y droga. Fiscal a exigi 4 aña di prison.

Hues a sera tratamento di e caso y a bisa cu 30 April 2021 lo tin sentencia.