Home Politics Ex Prome Minister Nelson Oduber: Eleccion 25 juni: No laga ningun...

Ex Prome Minister Nelson Oduber: Eleccion 25 juni: No laga ningun hende gaña bo of manipula bo!

SHARE

 

 

Nos ta bolbe bay urna electoral den un democracia parlamentario unda bo ta vota pa un parlamento cu mediante mayoria lo forma nos proximo gobierno. Cu tur e deficiencianan keto bay segun mi esaki ta e mihor sistema, unda ta reparti e podernan y wak si e ta funciona manera mester ta. E gobierno cu ser forma tin como tarea primordial, organisa y administra nos pais, segun nos constitucion y leynan y unda no tin ley, gobierno semper tin podernan special cu despues mester ser vigila y controla pa parlamento cu tin un hala di toolnan pa controla y vigila gobierno. Cu binimento di hopi uzo di social media hunto cu prensa bo tin e control cu por ta hopi severo si tin e transparencia necesario.

 

Kehamento cerca Hulanda

Nos a logra cu Hulanda dia 13 di juli 1990 cu nos ta saca e fecha di independencia 1996 for di den Statuut, pero ta keda cu e derecho di autodeterminacion, esta si un dia nos kier bira independiente na un forma ordena y responsabel por pero mester tene un referendum y cu mester haya den parlamento 2/3 parti pa sostene esaki. Cu nos tin e derecho ta hopi bon, pero segun mi por lo pronto no tin sosten den pueblo pa esaki.

 

Gobierno ta traha cu un presupuesto cu ta un ley cu ta autorisa gobierno pa por haci gasto segun un maneho. Door cu nos tabata haya pa hopi aña placa di Hulanda como ayudo pa desaroyo, esaki a trece un situacion di ta keda y ser haci hopi dependiente di Hulanda. Kico cu pasa aki tin partido politico y gremionan ta bay keha cerca Hulanda. Tin ora tin base pa esaki, pero hopi vez cu redashi cu a daña pa nos. Door di esaki politiconan Hulandes a crea un mal impresion di nos tur, cu nos lo ta corupto etc. Berdad tin cu a cay pa tentacion. Hasta tin hopi hende aki ainda cu e mentalidad Calimero, esta cu nos ta chikito y cu nos mes no por nada y ta Hulanda so por tur cos. Hasta mi por bisa cu tin casonan cu gobierno Hulandes ariba varios di e islanan a eherce influencia den resultadonan di eleccion. Lo mi bin despues cu ehempelnan.

 

Fiamento responsabel

Aruba desde 1986 a bira un pais autonomo cu tur e erornan di a intenta hopi cos, toch mi tin cu bisa cu hopi cos a bay bon. Tur pais ta fia placa y tin debe, pero e mester ta un cu su economia lo por genera e placa pa paga bek y e fiamento mester ta pa algo productivo of pa suavisa e condicionnan di debe.

 

Desde 1986 te 2009 cu mi a goberna den 4 gobierno y nunca nos a pasa 43% di debe relata na nos GDP cu segun IMF ta responsabel. Mi mes a lagele na 2009 na 2.2 biyon florin cu ta debe di e ultimo 25 añanan y nos economia por a produci e placa pa gobierno por paga bek. Nunca despues di 1986 te 2009 ningun di nos gobierno a pidi Hulanda ningun cen, ni pa fia, fuera di e placa den FDA cu nos ta pone hunto pa cierto inversionnan palabra. Aruba berdad mester a tuma cierto riesgonan y haci debe, pero te 2009 e tabata responsabel.

 

Fiamento iresponsabel

Con Gabinete Eman cu cooperacion di Hulanda y varios gremio – cu a firma yen di protocol cu nan – por a permiti durante 2010 pa 2017 pa na un forma iresponsabel redobla nos debe nacional for di 2.2 biyon te 4.2 biyon florin door di fia asina hopi placa, ta nan tur ta culpabel cu awe nos tur tin cu paga cu orguyo. Un otro ehempel di e debenan iresponsabel ta tur e proyectonan PPP, cu CAFT a pidi pa no firma, ya cu ningun di nan ta productivo pa trece placa den caha pa paga bek. Toch nan a ser ehecuta na un forma cu 25 aña largo, mas cu 6 gobierno y pueblo lo keda paga 83 miyon florin tur aña.

 

Populismo pa gaña y manipula bo

Awe e pandemia a dal nos y a caba di yuda haci cos mas dificil pa nos tur. Gobierno a bay fia placa di Hulanda  cu a abusa di su poder cu CAFT y COHO. Awor pa colmo, ata nos dilanti un eleccion adelanta. Ya e populismo pa gaña bo y manipula bo ta biento en popa. Esun cu bisa bo cu e lo kita tur e medidanan ta gaña bo, Esun cu bisa bo cu Aruba sin Hulanda por lo pronto lo sali afo ta gaña bo. Esun cu bisa bo cu no mester sanea e aparato gubernamental y cambia varios leynan manera  pensioen, AZV tambe ta gaña bo. Pa e proximo 25 añanan nos lo keda den debenan astronomico y sin Hulanda no tin solucion, sin medidanan cu lo corta den carni y weso. Si por cu disciplina di nos tur, cu inversionnan, habri nos economia, entradanan di gobierno lo mehora, pero lesa bon, e Mega Giga debe si ta keda pa paga.

 

Mi sugerencia na tur politico, no trata na gaña mi ni manipula mi, pasobra di awor te eleccion, lo mi keda duna mi contribucion na nos pueblo. Esaki ta mi obligacion moral y legal. Aki mi a nace y aki mi ta keda biba. Mi ta MEP, pero na prome lugar yiu di e pueblo aki.

Un contribucion pa yuda bo formula bo opinion y pa ningun politico gaña bo y manipula bo un biaha mas.