Saint Vincent:
Un area di e isla Caribense Saint Vincent mester wordo evacua hopi lihe, pa motibo di e menasa di erupcion di e volcan La Soufrière cu ta keda na e parti nort di e isla.
Tur e habitantenan cu ta biba of ta na e parti nort di e isla, a haya ordo pa bandona e area aki mesora y bay na un parti mas sigur di e isla. Esaki ta locual e Prome Minister di Saint Vincent y Grenadines, Ralph Gonsalves, diahuebs a anuncia.
Segun Gonsalves cu ta for di algun siman pasa caba, nan a cuminsa observa actividadnan sismico cerca di e volcan, pero diahuebs, segun su persona e la ricibi un yamada di e departamento di Calamidad di e islanan y nan a avis’e cu e zonidonan actual saliendo for di e volcan no ta e zonidonan cu normalmente nan sa scucha, pero cu e zondidonan actual mustra cu tin algo mas serio na caminda.
E departamento di calamidad te hasta a publica riba Twitter cu tin “un chens substancial di un desaster”.
E habitantenan mesora a cuminsa bandona e area aki den auto y den barco a sali for di e area aki y a bay na e partinan mas sigur di e isla. Royal Cruise Line a manda un di su cruceronan pa yuda evacua e habitantenan.
Segun e centro di investigacion Sismologico UWI, cu ta situa na Trinidad, a observa algun temblor bou tera di e volcan. Esaki ta indica cu e magma ta moviendo mas na e superficie. Tambe e volcan ta scupiendo shinishi y huma. Un posibel erupcion por tuma luga pronto.
La Soufrière ta e unico volcan activo na Saint Vincent y desde 1718 tabata tin cinco erupcion violento. Na 1902 mas di mil persona a perde nan bida durante e erupcion. E conocido pintor Britancio William Turner (1775-1851) a pinta e erupcion di 1812. E pintura ta colga den un Museo na Liverpool.
E ultimo erupcion di La Soufrière tabata na aña 1979, no tabata tin niun morto of herido, pa motibo cu henter e area a wordo evacua na tempo.
Segun nos a compronde, cu e erupcion di La Soufrière, ta wordo sigui di cerca tambe pa e departmentonan concerni di e islanan ABC, si acaso presenta un temblor cu por trece un tsunami cu ne.
Aruba su Prome Minister tambe a manda via su Facebook deseando su colega Prome Minister Ralph Gonsalves hopi forsa y tambe cu e tin e habitantenan di Saint Vincent sigur den oracion y pensamento.
