Home » Prome Minister Evelyn Wever-Croes: Discurso virtual di Prome Minister Evelyn Wever-Croes na COPPAL 2021: ‘ARUBA, CU CARA DI HENDE MUHE’

Prome Minister Evelyn Wever-Croes: Discurso virtual di Prome Minister Evelyn Wever-Croes na COPPAL 2021: ‘ARUBA, CU CARA DI HENDE MUHE’

by Admin
0 comment 88 views

 

 

Diahuebs atardi, Prome Minister Evelyn Wever- Croes tabata tin e honor di participa na e forum di COPPPAL 2021, “America con rostro de mujer” na unda durante su discurso a enfatisa e historia di ‘Aruba cu cara di hende muhe’. 

 

Prome Minister a introduci su discurso contando cu su omo Betico Croes (dfm), tabata un miembro fundador di COPPPAL y na momento di su morto, e ruman homber Rudy Croes tuma over y a bira e vicepresidente. Prome Minister a menciona tambe cu ta e mesun omo aki, Betico Croes, a funda e partido político Movimiento Electoral di Pueblo (MEP) cu awe e como ser femenino ta lidera cu orguyo. Pa e motibonan aki, e relacion entre COPPPAL y Aruba ta uno hopi estrecho y duradero.

 

Na 2017 Partido MEP a logra drenta gobierno dunando asina su persona e oportunidad di ta e prome ser femenino cu a logra e puesto di Prome Minister na Aruba. Prome Minister Evelyn Wever-Croes a menciona cu durante e temporada aki e mester a demostra cu hende muhe tambe por lidera un pais habriendo asina e caminda pa mas ser femenino drenta politica y por yega na posicionnan di liderazgo. 

 

Durante su trayectoria como Prome Minister di Aruba, e corant Americano “The New York Times” a publica un articulo titula “Aruba where women lead” señalando tur e cargonan di liderazgo cu ta ser ocupa pa ser femenino na Aruba. 

 

Na 2020, Aruba igual cu henter mundo a ser confronta cu e pandemia sin precedente COVID-19, y ta Dios so sa pakico e la scoge Gabinete Wever-Croes pa lidera Aruba durante e crisis aki. Prome Minister a splica cu Aruba su economia a ser afecta grandemente pa cu e pandemia aki mirando cu e pilar economico di Aruba ta turismo. E medidanan manera e ceramento di frontera y restrincion di biahe a resulta den un porcentahe halto di desempleo. Hunto cu e directora di Aruba Tourism Authority cu tambe ta un ser femenino, a traha un plan di recuperacion turistico. Pero aki ta unda cu a mira e importancia pa busca diversificacion economico.

 

Premier Wever-Croes a splica cu Gabinete Wever-Croes a identifica 6 sector economico cu ta: turismo y su diversificacion, economia di conocemento, agricultura, logistica, economia circular, y industria creativo. E proposito di Gabinete Wever-Croes tabata pa comberti e finanzas gubernamental den finansas sostenibel y responsabel y esaki tambe a wordo haci bou di Minister di Finansas y Economia  Xiomara Maduro cu tambe ta un ser femenino. 

 

Durante e pandemia e prioridad di Gobierno tabata pa evita retiro masal y preveni hamber y pobresa y pa cu esaki a brinda apoyo financiero na empresanan y na tur esnan cu a perde nan trabou. Tambe a provee alimentacion pa medio di Rode Kruis. E esfuerso mas grandi ta e vacuna contra e coronavirus y Gobierno ta spera di tin 85% di  e poblacion vacuna cu e prome vacuna pa mei 2021 y cu di dos vacuna pa Juni 2021. 

 

Aruba ta spera di recupera e aña aki y duna e bishitantenan un luga sigur pa biaha. Gobierno ta monitoriando e situacion actual y lo reforsa medidanan necesario. 

 

Loke ta un precupacion segun Prome Minister ta e posicion di e ser femenino despues di e pandemia aki ya cu nan ta esnan mas afecta. Hopi hende muhe como mama mester a laga nan trabou pa cuida di nan yiu cu no por a bay scol y ta sufriendo mas di violencia domestico door di e stress di e pandemia. Tur pais incluyendo Aruba mester pone mas atencion na e hende muhe den nan plan di recuperacion. 

 

Aruba a desaroya un plan di recuperacion cu yama “ Reposicionando e rumbo di nos pais” y ta desaroyando un proyecto pa fortifica e ser femenino hunto cu e seccion di muhenan di Nacionnan Uni. 

 

Por ultimo, Prome Minister a invita tur ser femenino cu ta den posicion di liderazgo pa uni na e compromiso awe mas cu nunca pa fortifica e posicion di e hende muhe den tur pais. Prome Minister ta convenci cu e hende muhenan den liderazgo ta bay ta e catalizador den e reforma y innovacionnan na Aruba y cu nan lo determina e éxito di Aruba su recuperacion economico. 

 

Prome Minister a gradici COPPPAL y en especial su amiga Sofia Carvajal pa e amistad y sosten. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio