Hilversum, Hulanda:
Corte na Hilversum a sentencia un homber cu un castigo di 3 aña di prison, pa motibo cu pa 13 aña largo e la abusa sexualmente di su yiu homber. E tata no ta tata biologico di e mucha.
Na 2018, ora e yiu homber a bira adulto, riba un dia e la confronta su tata cu e realidad di tur e abusonan sexual di 13 largo. Na momento cu yiu a confronta su tata cu tur locual e la haci cune, e yiu homber tabata grabando ful e combersacion. Den e combersacionnan e homber a admiti di a abusa su yiu homber, e la bisa ” mi a hacie, pero ta tempo cu bo tabata hopi jong”, den e grabacion por a scucha tur e actonan sexual y inmoral cu e tata a haci cu e yiu.
Despues di e combersacion e yiu tabata tin suficiente prueba y a bay polis, caminda e la entrega un keho di abuso sexual contra su tata. Den su declaracion e la bisa polis cu e ta corda cu e actonan sexual a cuminsa tempo cu e tabata tin apenas 3 aña. Segun corte e victima ta corda bon di e actonan di su tata, hopi detaya Segun e victima e abuso sexual tabata pasa mas cu un biaha pa siman.
Casonan di abuso sexual of di actonan inmoral, hopi biaha ta casonan den cual solamente dos persona ta envolvi, ta palabra di e yiu contra esun di e tata y pa condena un abusador, e declaracion di e victima mester wordo respalda pa un otro prueba adicional.
Corte a haya cu e declaracion di e yiu homber ta creibel. Ela duna un declaracion detaya y specifico tocante e 13 añanan cu e actonan sexual a tuma lugar. E declaracionnan di e victima a wordo bon respalda pa e grabacionnan den cual e tata a admiti. E tata mes a bisa e mama, cu e tabata drent’e un gana cu e no por controla y mester a keda mishi cu nan yiu homber y tambe e la bisa e mama cu e la haci actonan sexual cu ne.
Segun Hues e homber a comete un violacion grave riba e integridad fisico di su yiu y a abusa di e autoridad cu e tabata tin como tata. Segun investigacion haci pa experto, e tata ta mustra remordimento, pero asina mes no ta realisa completamente e seriedad di su actonan. E no ta compronde pakiko su famia a bira lomba p’e.
E tata a wordo haya culpabel door di corte y a keda condena cu un castigo di prison di 3 aña, pa e 13 aña largo cu e la abusa di su yiu homber. E tata a bay tratamento boluntariamente.