E situacion di Covid aki na Aruba poco poco ta mustrando stabilisacion. Cifranan di contagio nobo a bira menos pa e ultimo dianan cu un subida despues di e dianan liber di Pasco di Resureccion. Na hospital e total di hendenan cu mester wordo admiti tambe ta birando menos. Sinembargo, Prome Minister Evelyn Wever-Croes ta duna di conoce cu nos no mester sinti nos mes mucho confia si ya cu hendenan ta tarda hopi pa bay test mientras nan ta cana rond cu e virus un par di dia. Por lo tanto ta haci un apelacion na pueblo di Aruba pa keda cuida y si tin un sintoma haci cita pa test pa asina evita plamamento di e virus.
Mientrastanto Aruba ta yudando Corsou y Boneiro ya cu Corsou ta riba 4 mil caso y nan hospital ta yen. Consecuentemente pa hendenan por haña tratamento mester di mas cuido intensivo y nos a traha e ora ey e posibiliad pa por yuda e pashentnan aki pa haña nan tratamento den cuido intensivo. Na e momento aki tin 4 pashent di Corsou den cuido intensivo y un persona di Boneiro. Pa por a haci esaki, a amplia e capacidad pero mester a para loke ta tratamentonan regular den casi tur e casonan.
“Aruba semper ta cla pa yuda Corsou cu ta den un situacion hopi grave, nos semper meser tey pa yuda nos hermana islanan den reino. Ta 3 isla pais ruman y nos mester tey pa yuda otro. Nos a yuda Corsou tambe cu un par di coolbox pa transporta e vacunanan. Nos tin suficiente akinan y e ta bayendo bon. A nan falta y nos ta yuda nan. Na fin di dia e ta conta pa Aruba, Corsou y tur pais, vacunacion ta loke ta bay yuda nos”, Prome Minister a accentua.
Locual cu ta pasando na Corsou ta un consecuencia directo di e temporada di campaña y eleccion na unda cu no ta tur hende a tene nan mes na e reglanan manera mester ta. Aruba tambe a drenta un temporada di campaña cu eleccion dia 25 di Juni. Prome Minister ta haci un apelacion na comunidad pa no benta afo tur loke nos pueblo a sacrifica un aña largo. Ban sigui mantene nos na e reglanan cu tin actualmente pa evita cu e situacion bira manera di Corsou. P’esey ta importante pa nos cuida.
Prome Minister a anuncia tambe cu entrante e siman aki, ekipo di crisis ta trahando pa amplia e capacidad pa vacunacion. Aruba a haya 12 mil vacuna extra di Hulanda, haciendo posibel cu Aruba tin suficiente pa vacuna. Te na e momentonan aki tin 12400 persona cu a vacuna cu ta un kwart di loke kier logra. Entrante di otro siman ta bay amplia e capacidad na e Centro Libertador Betico Croes na unda lo por vacuna 3 mil persona riba un dia. E situacion na e momentonan aki no por acapara asina hopi hende, y cambionan ta wordo haci pa entrante e siguiente siman soluciona e problema aki pa asina duna 3 mil vacuna tur dia.
“Tur esnan cu a registra caba ta hañando nan cita den e proximo 1 pa 2 siman. Tur hende cu a registra lo haña nan vacuna. Awor ta keda na abo cu no a registra ainda. Nos tin e vacuna y si mester lo por busca mas. Nos mester yega 70 pa 80% di nos poblacion vacuna pa nos por bisa cu nos ta protehi. Nos ta conta riba bo!”, Prome Minister Evelyn Wever-Croes a enfatisa.
