Home Politics Mike de Mezas: Pueblo no a merece un gobierno asina sin gevoel...

Mike de Mezas: Pueblo no a merece un gobierno asina sin gevoel Reduccion di costo medico ta laga pueblo practicamente sin remedi

SHARE

Mike de Meza, parlamentario pa fraccion di AVP a mustra cu gabinete Wever Croes, cu por fin a libra pueblo di su maneho, no a perde e oportunidad di dal pueblo otro golpi fuerte siman cu a pasa.
“Mey mey di celebracion di Semana Santa, Evelyn Wever Croes a dicidi di bay gobernado dia 30 di maart pa entrega retiro di su gabinete, creando asina un scenario pa su gobierno claba pueblo un puñal den lomba atrobe.
Ta increibel con sin gevoel e gobierno di Evelyn aki a goberna e pais aki pa casi cuater aña, lubibando pueblo por complete, sutando e pais cu medida tras di medida, creando problemanan serio pa nos hendenan.
Practicamente gobierno di Evely Wever Croes a hinca man den cartera di tur hende, pa saca placa pa asina por financia un maneho cu tabata dirigi pa sirbi famia-, amigo- y sponsornan, lagando pueblo mes desampara totalmente.
Dia prome di April, cu ta e dia cu e lider di MEP ta conoci p’e ya cu esaki ta su reconocimento como gañado di pueblo, nos hendenan a bin conoce un berdad cruel, un berdad cu ta haci hopi dolor, ora cu nan a bay boticanan rond di e isla pa busca nan remedy.
Eynan cantidad di hende a cera conoci cu e berdad amargo ora cu nan a wordo informa cu di tur remedy prescribi pa nan dokter, ta solamente un of dos nan ta haya por nada y cu e otronan tin cu wordo paga cash, ya cu danki na Prome Minister su plan di reduci gasto den cuido medico, esaki ta asina.
Un persona cu a bay botica pa busca remedi pa dolor di cabes, pa dolor di stoma y tripa, a wordo mustra cu e tin cu paga casi 80 florin ya cu segun e lista di remedi cu a drenta na vigor dia prome di April, AZV no ta paga mas pa esakinan y ta solamente paracetamol so ta wordo cubri pa AZV.
Ta mas cu claro cu hopi hende malo a regresa nan cas sin remedi, sin alivio pa nan dolor ya cu na no tin placa suficiente pa paga pa esakinan.
Paracetamol awor tin cu wordo usa pa atende cu cualkier malestar ya cu no tin placa pa haya remedi adecuado y necesario cu tur consecuencia cu esaki ta trece cune.
Esaki ta gabinete Wever Croes, cu a priminti pueblo asina hopi sin duda nada, sin alivia nan situacion pero caminda famia y amigonan sin tin suficiente placa pa paga ya cu nan si a wordo beneficia pa gabinete Wever Croes.
E cosnan aki ta inhusto, hasta nan ta cruel y pueblo no a merece ningun momento e abuso y castigo aki di politiconan tracionero y abusado, incapas y sin vision, cu awe tin e pais aki caminda cu e ta, c’un pueblo sin speransa, c’un pueblo bibando den temor pa mas medida cu lo ta na caminda como regalo di Evelyn Wever Croes su gobierno,” Parlamentario Mike de Meza a declara.