Washington: Dialuna den careda di 7’or di anochi a sosode un accidente basta serio, mesora ta pidi pa presencia di ambulance, brandweer y polis.
Un Suzuki Sx4 maneha pa un homber, riba e caminda di Washington bay nort, e chauffeur lo a perde control, baha caminda y bay contra un palo di lus, rancando esaki completamente, causando cu gran parti di e area di Bubali, San Miguel, Koyari y Washington a keda sin coriente.
Hopi lihe polis a yega na e sitio y enberdad a topa cu e area completamente scur, e auto tabata gebolter y wanta na e palo di lus y e palo di lus tabata wanta na un cabel. E chauffeur, ta un homber di edad, tabata seriamente herida, cu hopi sla na cabes y tabata sangrando hopi.
Polis mesora a cera e caminda y un rato despues ambulance y brandweer a yega na e sitio. Paramediconan di ambulance a trata e homber na e sitio y asina cu nan a stabilis’e cu urgencia e la wordo transporta pa hospital.
Presencia di Elmar a wordo pidi cu urgencia na e sitio, mirando cu e palo di lus un ora pa otro lo por cay, e tabata wanta na un cabel. Hopi lihe Elmar a yega. Departamento di trafico a presenta na e sitio y a pidi presencia di BFTO (departamento tecnico di polis).
