Home Politics Prome Minister Evelyn Wever-Croes: MAESTRONAN TA VACUNA Si nos maestronan...

Prome Minister Evelyn Wever-Croes: MAESTRONAN TA VACUNA Si nos maestronan ta protegi nos por garantisa continuidad di enseñansa

SHARE

Despues cu Gobierno di Aruba ora a tuma e decision pa cera scolnan mas trempan y implementa e medidanan mas severo pa e dos simannan, a dicidi cu ta un bon momento pa percura cu tur docente den enseñansa por haya nan vacuna. Cu 1 dosis ya un persona ta protegi pa 75% y p’esey a pensa cu esaki ta un bon periodo pa enfoca pa maestronan haya e oportunidad aki. Pa por a logra esaki a acerca SIMAR, SKOA y diferente schoolbestuur. Maestronan a keda hopi contento cu e decision aki.

Diasabra mainta, Prome Minister Evelyn Wever-Croes tabata na e centro di vacunacion na Santa Cruz na unda docentenan di Aruba tawata na turno pa haña vacuna entre nan Presidente di SIMAR y Directora di SKOA.

“Mi ta gradici maestro y maestranan cu a bay vacuna. Esaki ta haci mi contento. Mi no ta Minister di Enseñansa, pero mi tin enseñansa cerca di mi curason y mi sa cu si maestronan vacuna tin mas chance cu scolnan ta sigui sin interupcion despues di vakantie”, Prome Minister Evelyn Wever-Croes a duna di conoce.

Prome Minister ta gradici e rol di e organisacionnan aki pa por a haci posibel pa yega na e maestronan pa asina nan wordo vacuna den e periodo aki. Cu e paso aki sigur e lo yuda Aruba pa evita mas problema, pasobra si nos maestronan ta protegi nos por garantisa continuidad di enseñansa. Esaki ta hopi importante considerando e cantidad di les cu nos muchanan a perde den transcurso di e ultimo aña aki cada biaha cu cera scol y/ of door di cuarentena

Na e momentonan aki Aruba tin 20 mil hende cu a haya vacuna. Esaki kiermeen cu tin 20 mil hende cu ta por lo menos 75% protegi. Y tin 38 mil persona cu a registra caba pa vacuna. Banda di esaki lo haya 12 mil vacuna extra di Hulanda cual no tabata planifica, pero ta netamente door di e cantidad di hende registra, cu esaki a bira posibel.

Prime Minister ta haci apelacion riba tur hende pa por fabor registra pa por vacuna, mientras cu tin mas registro ta drenta, mas vacuna lo drenta. Tur esnan cu a registra te cu e siman aki, dentro di dos siman nan lo ricibi nan vacuna pasobra tin suficiente y asina lo caba tambe cu e lista di espera cu tin.

Ta duna danki na SIMAR, SKOA y tur otro school bestuur y specialmente maestronan cu a vacuna. E unico manera pa nos sali for di e crisis y efecto devastador di e crisis aki na Aruba ta door di vacuna nos mes. Un noticia sumamente importante cu a sali na cla ta cu unabes un persona ta vacuna e no por transmiti e virus mas pa otro hende, esaki ta comproba y pues consecuentemente lo bay evalua pa esnan cu ta vacuna ya no mester test ora di drenta un Pais.

“Aworaki ta memey di dos siman for di cual a detecta como momento critico, awor como Aruba nos por demostra si como pueblo tin e madures y responsabilidad pa domina e Pandemia si of no. Si nos sigui cu aglomeracion y actitud iresponsabel nos lo perde e bataya y no kier pa pasa locual cu ta pasando na hermana isla Corsou”.

Pa conclui Prome Minister Evelyn Wever-Croes ta haci apelacion na comunidad pa un siman mas, limita movecion mas cu ta posibel y registra pa vacuna pa no plama e virus, e orey pronto nos por bisa cu e pio ta tras di lomba.