Dutch Caribbean Nature Alliance (DCNA) a lansa su website completamente nobo. Den un comunicado di prensa emiti pa e red non-profit di conservacion di naturalesa crea pa salvaguarda naturalesa den Caribe Hulandes, DCNA a brinda varios aspecto destaca tocante con su website nobo ta facilita intercambio di informacion no solo entre e miembronan di e red di conservacion di naturalesa, sino tambe entre publico en general.
Diferente cu e website anterior, e website nobo lo conta cu varios portal di informacion interactivo cu lo haci cu intercambio di informacion tocante conservacion di naturalesa, maneho, investigacion y proyecto educativo den Caribe Hulandes por ta mucho mas accesibel.
Plataforma di noticia interactivo
Den e website nobo, e lectornan por haya e ultimo noticianan tocante naturalesa cu un enfoke riba proyecto di investigacion y monitoreo cu ta surgi di Caribe Hulandes a traves di un plataforma di noticia totalmente interactivo yama (Bio)News (https://dcnanature.org/news/), tambe optimalisa pa su visualisacion den plataforma movil. Si e website mes lo ta na Ingles, e diferente noticianan tocante naturalesa lo wordo traduci na Papiamento, Papiamentu y Hulandes y lo ta disponibel riba e website. BioNews ta conta cu e apoyo amabel di Ministerio di Agricultura, Naturalesa y Calidad di Alimento.
Conservacion di naturalesa den Caribe Hulandes
Tambe lo presenta un descripcion general interactivo di e proyectonan activo di investigacion y monitoreo den Caribe Hulandes y e lectornan lo por cera conoci cu e miembronan di Red di DCNA y cu e Secretaria di DCNA. Tambe lo duna un descripcion general di e diferente leynan di naturalesa y conservacion y proyecto educativo pa e seis islanan di Caribe Hulandes. E bishitantenan di e website tambe tin acceso na dato di naturalesa y conservacion a traves di link di base di dato regional, incluyendo base di dato di biodiversidad di Caribe Hulandes (DCBD), y link na website di miembro socio di DCNA. Tambe por haya documento specifico di DCNA, manera informacion tocante maneho exitoso pa e organisacionnan di maneho di area proteha pa e seis islanan, ademas forma con residente y turista por participa na conservacion den nan respectivo islanan pa medio di vacatura, trabou voluntario, registro di naturalesa, observacion y posibel asociacion.
“Mi lo kier gradici specialmente e contratistanan; Bram Perry, Deviate Design y Coastal Dynamics, pa nan ayudo den desaroyo di e website, asina tambe e colaboradonan di DCNA Photobank cu a yuda nos presenta e bunita naturalesa di Caribe Hulandes riba nos website. Nos ta spera di curason cu boso lo disfruta di e website nobo aki y cu boso lo siña hopi mas tocante conservacion di naturalesa den Caribe Hulandes ”, Tineke van Bussel, Oficial de Comunicacion y Investigacion di DCNA y lider di proyecto pa desaroyo di e website nobo, a comenta.
E website nobo di DCNA, www.dcnanature.org, a keda realisa danki na e sosten continuo di Loteria di codigo postal Hulandes.