Sero Patrishi – Diabierna mey anochi rond di 12:30 varios unidad policial a bay Sero Patrishi, poco pabou di Flores Supermarket pa un caso di maltrato.
Segun informacion, un homber lo a dal un hende muhe cu un pida palo na su pia.
Informacion adicional tawata cu mester bay cu cautela, debi cu e tipo aki lo por tin arma ariba dje.
Varios patruya hunto a yega e adres y sin ningun problema a topa cu e tipo. Loke si por a scucha tawata intercambio di palabra entre e homber y un muhe den e cas.
Polisnan despues di basta rato na e sitio unda a rista e vehiculo completamente a aresta e homber, esaki pa evita mas problema tambe. E palo cu e la usa pa dal e dama si a wordo haya y confisca.
Transportwagen di Playa a yega y a hiba e homber warda di Playa.
Parse cu ya mas trempan tawata tin un problema caba cu e persona aki.
Por spera mas problema durante e weekend largo nos dilanti.
