ORANJESTAD – Diaranson Minister Maduro a haci entrega di Presupuesto 2021 na Presidente di Parlamento den presencia di Griffier di Parlamento y Secretaris di Conseho di Minister.
E biaha aki e Presupuesto di Pais Aruba a wordo entrega den formato digital por medio di un USB stick diseña specialmente pa e ocasion importante aki. Hunto cu e ley di presupuesto, Parlamento a ricibi tur conseho cu ta regarda e ley y tambe un documentacion cu ta visualisa e contenido di e presupuesto. Esaki ta pa yuda facilita e Parlamentarionan cu e trabou presupuestario, na unda cu nan por haya un bista di biaha di e resultado di e presupuesto, e gastonan y entrada di Gobierno.
Minister Xiomara Maduro ta spera cu no obstante e situacion cu a surgi, cu Parlamento lo por trata e ley importante aki prome cu e eleccion venidero. E mandatario ta gradici Departamento di Finansas pa tur trabou y esfuerso haci pa cu Presupuesto 2021, specialmente pa e formato digital y e visualisacion cu ta yuda e proceso presupuestario di nos Pais.
