Home Local Pone atencion un bes mas pa hunto nos combati’e Regla na Hospital...

Pone atencion un bes mas pa hunto nos combati’e Regla na Hospital ta pa proteha pashent, bishitante y personal

SHARE

Desde inicio di e pandemia aki Dr. Horacio E. Oduber Hospital a introduci diferente regla pa asina minimalisa riesgo di contagio di Covid-19 cu meta primordial pa proteha tur pashent, bishitante y alabes miembronan di personal. Pero ta importante pa un bes mas recorda tur hende cu mask ta obligatorio na Hospital. Na momento di yega Hospital nos tin nos miembronan di siguridad pa asina instrui tur bishitante un ke otro pa bo bishita ta lo mas placentero posibel.

Regla pa bishitante di pashent admiti
Ta permiti solamente 1 (un) bishitante fiho y mayor di edad (18 aña of mas) pa pashent interna. Tene bon na cuenta cu mask ta obligatorio y como extra precaucion lo duna e bishitante di pashent un mask nobo prome cu drenta Hospital. E orario di bishita lo sosode na un orario fiho cu un duracion di 1 ora. E orario fiho aki lo ser comunica directamente cu e pashent/ bishitante pa asina por keda garantisa distanciamento social den cada camber.

Regla pa bishitante di pashent cu Covid-19
Si un pashent interna tin Covid-19 no ta permiti’e pa ricibi bishita. Esaki ta pa asina minimalisa riesgo di contagio entre famianan y alabes pa proteha nos miembro di personal. Cuido di pashentnan cu Covid-19 ta intenso y nos no kier yega na un momento cu tin scarcedad di personal pa motibo cu nan ta malo di salud.

Regla pa bishitante di pashent cu Covid-19 den fase terminal
Hospital ta mira e importancia di e parti emocional y humano y pues aki lo por haci un excepcion. Na otro partinan di mundo mayoria di biaha no ta ni permiti bishita na momento cu un pashent ta terminal. Tin excepcion pues pa pashent cu Covid-19 cu ta terminal cual por ricibi bishita di solamente casa y yiu(nan). Semper haciendo uzo di proteccion corecto pa minimalisa riesgo di contagio.

Desde awo caba kier a desea tur hende Feliz Pasco Grandi pero por fabor abstene di loke ta aglomeracion, corda semper riba distancia social y mantene un bon higiena di man. Directiva, staf y personal di Hospital ta gradici tur hende pa nan comprension y cooperacion. Hunto nos por combati’e!