Home Local EXITOSO TORNEO DI GOLF DI KIWANIS CLUB OF ARUBA COMO RECAUDACION DI...

EXITOSO TORNEO DI GOLF DI KIWANIS CLUB OF ARUBA COMO RECAUDACION DI FONDO

SHARE

Riba 20 di maart 2021, Kiwanis Club of Aruba a organisa su di 11 torneo anual di golf na The Links na Divi, pa asina conmemora nos Dia Nacional di Himno y Bandera y tambe pa recauda fondo pa por sigui ofrece ayudo na e comunidad di Aruba.

Aña pasa, pa motibo di e pandemia, e club a cancela e torneo pa prome biaha den 11 aña. Pero e aña aki, Kiwanis Club of Aruba a dicidi di continua cu e tradicion na un manera cu ta respeta e protocolnan di DVG, pa asina nan por sigui sirbi muchanan y famianan den necesidad, specialmente den e momentonan dificil aki cu nos comunidad tin mester di mas ayudo cu semper.

E torneo di golf tabata di 18 ‘holes’ den team di 4 persona cu e formato scramble. Tabata tin 2 ‘flights’; e prome a cuminsa pa 9’or di mainta y e di dos 1’or di merdia. E evenemento tabata yena cu diferente premio pa e hungadonan, incluyendo e premio mayor pa e ‘hole-in-one’ cu tabata un 2020 Mercedes-Benz A-Class Sedan, cortesia di Yrausquin, pero ningun hungado a logra bay cu e premio unico aki.

Na final di dia, e resultadonan a bira conoci:
Best Nett: The Eliminators Team – Edsel Rooi, Oneal Taveras, Julia Pinera y Percival Young
Best Gross: Party Grossers – Randolph Arends, Hunt Riley, Edson Kelly y Eddy Rivera
Closest to the Pin: Alex Hoek
Longest Drive (Men): Nigel Nedd
Longest Drive (Ladies): Indirah Ras

Pa e resultadonan completo, por bishita: https://online.golfgamebook.com/leaderboard/2ua-mkqz

Kiwanis Club of Aruba kier gradici The Links na Divi pa nan servicio, cuminda y campo di golf excelente; Yrausquin pa a patrocina e premio pa ‘hole-in-one’, un bunita Mercedes-Benz A-Class nobo; Aruba Trading Company pa a provee e bebidanan durante e torneo; y tur e 88 hungadonan cu a haci e evento aki un exito, un danki grandi pa e apoyo. E fondonan colecta lo bay directamente na Cas Blechi di Stichting Verstandelijke Gehandicapten Aruba (SVGA), un proyecto cu a lansa aña pasa pa acomoda un total di 10 mucha/hoben cu limitacionnan, entre 6 y 24 aña, cu ta keda bou di cuido di trahadonan di SVGA. E club ta mas cu orguyoso pa duna nan apoyo na e bon causa aki cu ta yuda proteha, cuida y desaroya nos hobennan cu por ta no tin e mesun oportunidadnan cu otro. Pa mas informacion tocante Kiwanis Club of Aruba, por bishita nan website na: www.kiwanisclubofaruba.org Pa mas informacion tocante Kiwanis Club of Aruba, por bishita nan website na: www.kiwanisclubofaruba.org