ORANJESTAD – Corte den Promer Instancia, via video conference a trata e caso penal cu Ministerio Publico a cuminsa contra e homber Colombiano B.(47).
Aruba Native por a compronde cu e acusado B. a admiti di a mishi cu e mucha pero ta haya cu el a sinta suficiente castigo.
Fiscal a acusa B. di actonan inmoral di e mucha R.(9) durante 2019. B. a mishi cu partinan intimo di mucha. Mama di e mucha tabata presente den sala di Corte y tabata yora ora cu tabata tratando e caso.
Hues a puntra B. si ta berdad cu el a haci actonan inmoral cu e mucha L.(9) Ta asina cu B. ta admiti. Hues a bisa cu na Polis B. a admiti pero no completo manera L. a declara na Polis. Hues a bisa cu L. a declara cu B. a bay 5 of 6 biaha na dje y pidi’e baha su carson di abao of B. mes a kita esaki y mishi cu su man na L. su partinan intimo y pechonan. Segun B. esey no ta berdad cu el a baha e mucha su carson di abao. Hues a puntra B. kico el a haci. B. a bisa cu esey a sosode un biaha ora e tabata na cas den sala. E tabata mira television y e mucha a bay serca dje y e mucha a pone B. su man na su parti intimo cu su paña bisti y e ora ey B. a mishi cun’e. El a bisa cu esey a sosode diferente biaha y un biaha e mucha ta bay sinti riba B. y haci movecion y B. a push’e for di dje. Cada vez e tabata haci esaki y ta e mucha mes tabata busca.
Hues a remarca cu B. ta admiti pero ta tira culpa riba e mucha. Segun B. ta dificil pa splica cu un homber ta laga su mes wordo manipula pa un mucha muher di 9 aña. El a bisa cu e no ta tira culpa riba e mucha sino cu e ta culpable di haci cosnan cu no por. Pesey el a admiti su culpabilidad.
Hues a mustra cu tin un raport di psycologo cu ta mustra cu B. ta bay hopi misa. Na opinion di e psycologo, B. no por compronde pakico el a haci asina. Psycologo ta haya B. responsabel pa su actonan. Reclasering ta haya cu lo ta bon pa B. haya guia.
Fiscal a bisa cu e ta haya legalmente proba cu B. a mishi cu e mucha diferente biaha. E sospechoso ta admiti pero cu ta bisa cu e no a kita carson di abao di e mucha. Fiscal a tene cuenta cu B. a wordo kita for di trabou y no tin permiso pa estadia. E chens ta grandi cu si e bay pidi permiso esaki lo wordo rechaza. Mirando e situacion, e chens ta grandi cu ora e wordo laga liber di KIA, e lo wordo saca for di Aruba. Fiscal ta haya cu pesey no por duna castigo combina. El a exigi 30 luna di prison.
Hues, despues di a scucha defensa di abogado mr. Emerencia a sera tratamento di e caso y a bisa cu e ta haya legalmente proba cu B.a haci actonan inmoral cu e mucha L.(9). Hues a bisa cu casonan asina ta hopi serio y ta causa hopi daño na mucha. El a tuma B. na malo cu a abusa di confianza di e mama, e mucha y ta manera un famia. Hues a condena B. na 30 luna di prison di cual 10 luna ta condicional cu un tempo di prueba di 2 aña y bao guia di Reclasering.