Pos Chikito/ Mangel Halto:
Diadomingo den oranan di mainta polis a bin topa cu e chauffeur di e Toyota rav4 numera A-55693. E chauffeur cu tabata wordo busca a wordo haya na Mangel Halto Bar. Mesora e polisnan a detene e chauffeur y a confisca su auto.
Tur cos a cuminsa diasabra den oranan di merdia, un patruya di polis a nota un Toyota Rav4 coriendo basta iresponsabel riba e caminda di barcadera. E polisnan mesora a duna e auto un señal pa e para, pa motibo cu e ta causando peliger riba caminda, pero e chauffeur no a respeta ordo di polis y aki a cuminsa e prome persecusion.
E chauffeur di e Rav4 a ocasiona un accidente na rotonde di Mahuma y a sigui core. E polisnan a tuma e number di auto y a sigui’e te na Meiveld, caminda nan a perde for di bista. Despues di un rato e Rav4 a wordo mira riba caminda di Piedra Plat un poco pariba di Bright Bakery.
Mirando cu polisnan a tuma e number di auto caba y nan lo tabata sa caba na ken e auto aki ta pertenece, no a worry pa sigui persigui’e. E auto a wordo varios biaha señala como un auto cu ta coriendo hopi iresponsabel y cu tabata formando peliger riba caminda.
Durante Toque de queda na varios ocasion e Toyota Rav4 a wordo señala riba caminda, e tabata coriendo te hasta cu un flat tire, lus di auto paga y door cu caminda tabata keto e tabata keda swing cu su auto riba caminda. Varios unidad di polis a sali busca e auto aki y den un di e persecusionnan, na Savaneta un patruya di polis a perde control y a dal contra un cura di cas.
E chauffeur a keda burla di polis durante Toque de Queda, e tabata keda circula cu velocidad halto y lus paga den e area di Pos Chikito, Savaneta, Seroe Alejandro, Mabon, Brazil y Noord Cura Cabay etc.
Algo prome cu 4’or di marduga e la wordo mira na Santa Cruz.
Nos no sa kiko lo por tabata pasando den cabes di e chauffeur, si e por tabata bou influencia di un of otro substancia, pa a expone su bida y di otro tambe na peliger.
