Tanki Leendert:
Diasabra pa mas o menos 2’or di merdia, polis a topa un auto sospechoso riba e caminda di Tanki Leendert pa Paradera, mesora a para e auto y a resulta cu ta trata di un taxi pirata.
E taxi un Toyota Corolla tabata tin varios pasahero. Polis mesora a hala atencion di e personanan y despues a detene e chauffeur y a confisca e auto.
Taxi pirata ta un fenomeno cu ta existi pa hopi tempo caba na Aruba, Polis constantemente ta garanan y awo ta detene e taxista pirata y ta confisca nan auto.
Taxi pirata ta ora un persona sin permiso di taxi ta core riba cierto camindanan principal y ta pasa piki pasaheronan para canto y ta transporta nan di un caminda pa otro, anto ta cobranan pa e servicio aki. E chauffeur aki no tin permiso di taxi, pa por cobra pa transporta hende.
Un ruta cu hopi biaha polis sa topa cu taxinan pirata, ta e caminda di Misa di Playa bay direccion Noord. Pero e taxistanan pirata aki ta move rond di Aruba tambe.
Segun nos a compronde, e pasaheronan ta para canto di caminda y e taxista pirata ta haci un señal cu nan, e pasahero ta duna e taxista pirata señal bek. Anto e ora e taxi pirata ta para y ta subi e pasahero den su taxi, hibe su destino y cobre pa su servicio.