Home » Robert Candelaria (AVP): Lo vigila si Minister Bikker y Croes lo permiti importacion di trahado stranhero tuma luga

Robert Candelaria (AVP): Lo vigila si Minister Bikker y Croes lo permiti importacion di trahado stranhero tuma luga

by Admin
0 comment 70 views

Recientemente parlamentario Robert Candelaria a adverti ministernan Andin Bikker y Glenbert Croes riba un peticion di un hotel grandi cu ta cuminsa cu un programa di renobacion. Esey ta un bon noticia!

E parlamentario a sigura cu ta aplaudi tur inversion, specialmente awor cu ta den tempo di pandemia. Locual si e no lo acepta, ta pa e cadena di hotelnan sigui cu nan plan pa importa como 100 trahado stranhero pa haci e trabou. E ta sigur cu nan lo uza algun trahado di Aruba tambe, pero esey nunca por ta e intencion. Pasobra na Aruba mes nos tin metsla, carpinte y electrcien. Nos no mester ningun trahado bini for di paisnan di Centro America pa bin haci e trabounan aki. Door di permiti e hotel pa trece e cantidad di trahadonan di construccion pa Aruba, ta kita pan for di boca di nos mesun hendenan, algo cu partido AVP lo para duro pe!

Di acuerdo cu e parlamentario, otro siman caba lo por cuminsa mira grupo grandi di trahadonan stranhero lo yega Aruba pa bin traha pa un compania di construccion stranhero cu e trabou di renoba un hotel na Aruba. Lo vigila e asunto aki di cerca, specialmente awor cu tanto minister Croes como Bikker a sigura cu ningun peticion a drenta na DIMAS ni na DAO pa duna permiso na un grupo grandi di trahado. E ora e trabou pa Migracion ta mas facil pasobra masha lihe lo nota supuesto “turistanan” yegando for di paisnan no usual pa bin Aruba. Parlamentario Candelaria no ta confia e asunto aki, pasobra sea e ministernan no ta papia berdad of e hotel a opta pa trece un cantidad di trahado Aruba pa bin traha aki den forma ilegal. Esey riba su mes tambe ta un hecho castigabel y condenabel.

Pa partido AVP ta evidente cu e situacion di Covid-19 ta pone un presion riba tur hende, hasta riba comercio. Tin comprension pa esey. Pero, di otro banda, no por ta asina tampoco cu Gobierno ta pagando parti di payroll di hotelnan pasobra nan ta bashi, anto di nan banda ta bira busca trahado stranhero pa bin haci trabou di renobacion y nan si ta paga nan salario. Si por paga pa trahado stranhero bin renoba hotel, e ora por paga e trahadonan di Aruba tambe nan salario. Y net ora cu ta bay inverti, ta opta pa uza “cheap labor” door di trece trahado for di paisnan Latino Americano pa paga nan menos di locual lo mester paga un trahado Arubiano. Asina nunca por bisa cu a inyecta un suma den nos economia, pasobra e hotel ta trece tur material di afo, sin cumpra necesariamente na Aruba y comosifuera poco ta trece trahado di afo tambe. Y pa colmo awo gobierno ta sigura cu nan no a ni pidi permiso tampoco pa e trahadonan cu ta na caminda caba pa Aruba.

Awor ta ora pa midi cua compania ta sostene nos economia, cua ta sostene negoshinan local y cua ta sostene trahadonan local tambe. Door di traha cu companianan stranhero cu trahado di construccion stranhero ta un forma di menosprecio contra nos mesun hendenan y pa e pais cu ta percura pa tanto ganashi pa e hotel. Lo spera otro siman riba yegada di e trahadonan aki y si gobierno no actua, nan lo ta mesun culpabel! Ta teme cu lo purba regla un ke otro den pura pasobra constantemente minister Glenbert Croes ta den prensa hayando sosten y ayudo y sponsor di e hotel specifico aki, pues tur wowo ta riba dje awo. AVP lo para duro pa contratistanan y trahadonan local pa sigura cu ningun minister ta tribi pa habri porta pa importa trahado tanten cu nos mesun contratistanan ta na cas sin trabou!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio