Home Corte Danies condena na mas cu 12 luna di prison

Danies condena na mas cu 12 luna di prison

SHARE

ORANJESTAD – Awe mainta Hues di Corte den Promer Instancia a dicta sentencia den e 11 casonan penal cu Ministerio Publico a cuminsa contra R.Danies. Algun siman pasa tratamento di e caso a tuma lugar caminda Fiscal a exigi 270 dia di prison, cual ta mas o menos 9 luna di prison.

Aruba Native por a compronde cu Hues no ta haya proba cu Danies a menaza su mama y omo cu morto. Hues a mustra cu dia 1 December 2019, e mama di Danies a haci denuncia di menaza di morto contra di Danies. Na opinion di Hues, no tin prueba di sosten. El a sigui bisa cu dia 25 September 2020, e omo a haci denuncia di menaza. E omo di Danies a bisa cu su yiu na Hulanda a bis’e cu door di papia cu Danies a compronde cu Danies a menaza cu morto. Hues ta haya cu aki tampoco no tin prueba pasobra no a scucha Danies expresa esaki.

Hues a sigui bisa cu e ta haya legalmente proba tur e otro acusacionnan contra Danies.

Hues, pa cu e castigo, a tene cuenta cu Danies a pinta pro pedofile riba propiedadnan di Gobierno y otro lugar. Ademas a menaza y ofende Polis. Hues ta haya cu Danies a tacha e agentenan di Polis nan bon nomber y mustra falta di respet. Hues a mustra cu Danies a lanta un grupo di hende su tras pa manifesta. Hues a tuma Danies na malo cu via live stream a laga kima lugarnan. Hues ta haya cu intencional Danies a keda sin mantene na reglanan pa evita cu ta plama Covid y cu esaki ta pone salud di comunidad na peliger.

Hues a mustra cu e ta tene cuenta tambe cu anterior Danies a yega di wordo condena pa cosnan similar y esey no a yuda trece cambio den Danies.

Hues a sigui bisa cu e raport di psychiater ta mustra cu Danies no ta bon di cabez y tambe e uso diario di marihuana. Psychiater a pidi pa tuma Danies menos responsabel pa su actonan. Psychiater a conseha guia di Reclasering y tratamento na Respaldo.

Hues ta haya cu e tardamento di trece e caso Danies den Corte, a surpasa e periodo di proceso husto. Esey ta un violaciona di e proceso husto y esey ta causa reduccion di castigo.

Hues a condena Danies na 98 dia di prison pa viola 7 biaha e toque de queda. Pa e otro delitonan, 12 luna di prison di cual 3 luna ta condicional cu 3 aña di prueba. Hues a pone como condicional special cu Danies ta cay bou guia di Reclasering caminda Danies mester atene su mes na indicacion di Reclasering y hasta si ta encera tratamento di psychiater. Ademas Hues a ordena pa Danies paga na dañonan causa cu ta suma mas cu 6 mil florin y si e no paga e lo mester bay 140 dia sera den prison.