Diamars mainta Aruba a wordo confronta cu e noticia cu Raad van State (RvS) a emiti su “conseho” riba e proposicion di e Minister di Binnenlandse Zaken Hulandes pa locual ta trata e “consensus- Rijkswet”
COHO.
A surgi di inmediato diferente reaccion, hasta por bisa di hubilo pa dos motibo.
Na prome lugar e “conseho” di RvS parce a crea cierto speransa cu awor lo por tin e posibilidad pa trece cambionan ainda den e “Rijkswet” como tambe e “Landspakket”. Di otro banda pa esnan cu descaradamente a entrega nos autonomia, e “conseho” lo por ta un forma pa salba cara awor dilanti di eleccion. Ta conoci cu UPP for di un principio a rechasa e forma dictatorial cu e gobierno di Reino a pasa e “Rijkswet” door di nos strot, pero igualmente UPP a cuestiona e forma cu sra. Evelina Wever-Croes a hiba e negosacionnan. Cu apoyo di Parlamento a hiba un negosacion sumamente debil y entreguista. A involvi supuestamente gremionan y partidonan politico cu e excusa di lo tene cuenta cu nan opinion den e desicion final. Esaki a resulta di ta simpelmente “windowdressing” , pasobra e desicion ya caba tabata tuma. Historia lo mustra cu Gobierno y Parlamento a sucumbi masha liher pa e presion hulandes pa falta di UNION, corahe politico, preparacion debido y di e forma aki tambe a permiti Hulanda humiya nos pueblo cu entrega di nos autonomia.
E preguntanan cu ta surgi awor ta si sra. Wever-Croes lo por representa interes di nos pueblo debidamente despues di a faya barbaramente durante e prome negosacion. Ta importante pa sa kico exactamente e “conseho” di RvS ta encera, pasobra ya caba tin sospecho cu e “conseho” lo conduci na un diferencia di “interpretacion” entre gobierno di Reino y e gobiernonan di e Islanan. UPP ta di opinion cu e Statuut ta duna cierto indicacion con e lasonan entre e partnernan di Reino mester wordo interpreta, pero na final di cuenta historia a mustra cu ta e opinion di e partner mas poderoso Hulanda ta loke ta conta. Esey a wordo specificamente exponi door di ex-premier Balkenende ora cu ela declara cu RvS ta duna un “conseho”, pero ta e gobierno di Reino, pues Hulanda, ta esun cu ta dicidi.
Tin mas pregunta cu ta exigi contesta despues di cu e “conseho” a bira publico. Na prome lugar e negosacion lo bay encera solamente e “Rijkswet” of lo inclui tambe e “Landspakket”? UPP ta duda cu e “conseho” di RvS lo bay habri caminda pa papia riba e condicionnan stipula den e “Landspakket”, pasobra RvS a declara di ta completamente di acuerdo cu e condicionnan. E unico opcion lo bay ta e ora evalua e “Rijkswet” y si en berdad e ta en pugna di loke ta para den Statuut. Aki ta na unda e rabo di e porco lo bay krul, pasobra no ta interpretacion di e letranan den Statuut lo bay ta e topico di discusion, pero si e gobierno hulandes tin suficiente confiansa den palabracion cu ta haci cu Aruba of no. Hulanda na diferente ocacion a laga sa di NO tin confiansa den e forma cu gobierno ta atende cu maneho di e pais pa e ultimo diez añanan. E desconfiansa a bira pio despues di cu sr. Thijssen y Tjon, apoya pa nos Prome-Minister, a kere di por hunga wega di “SUPERMAN” ora cu kier a trece cambio den e LAft. Aki ta na unda gobierno hulandes a “trek een streep” y a declara di lo kier bin cu extra control si dicidi pa duna Aruba un fiansa. Knops ya caba na diferente ocacion a menasa hasta di lo para e fiansa si encaso e Paisnan no cumpli.
Sr. Tjon y sra. Wever-Croes mester compronde cu e disfras di “superman” a faya den pasado y no lo impresiona Hulanda pa nada, alcontrario elo duna mas motibo pa keda para firme riba e acuerdo. Pa trata na logra un debate cu posibilidad pa cambio, mester busca apoyo prome aki na Aruba den forma di un Compromiso Nacional sincero y transparente, unda ta delinea e deseo y postura Arubano. Igualmente ta necesario pa Aruba demonstra promé di ta serio den ehecucion di cambionan fundamental door di introduci awor reglanan estricto di bon gobernacion y rechasa faboritisimo y corupcion. Usa e mesun tactica anterior door di haci comosifuera tin oido pa opinion y preocupacion di gremionan y partidonan, na final di cuenta lo hiba nos na e mesun resultado esta complace cu Hulanda y atrobe pone nos pueblo na rudia y cana “coho”!
P’esey UPP ta di opinion cu sra. Wever-Croes no por tin e pretencion ni credibilidad ni e legitimidad di pensa di por negocia pa nos Pais. UPP atrobe ta propone pa yega na un Compromiso Nacional a base di un encuentro nacional. Historia a mustra cu UNION y presentacion di un Proposicion Nacional lo por tin mihor posibilidad di exito.