Oranjestad- Diasabra dia 27 di maart famianan, individualnan, empresanan y cuidadnan full rond mundo ta aporta na ‘Earth Hour’ den e forma di paga luznan pa un ora of mas y asina contribui na un mundo sostenibel, cual ta e meta en general.
‘Earth Hour’ ta un movecion ambiental global, cu a inicia na Sydney – Australia na aña 2007. Na aña 2008 ‘Earth Hour’ a ricibi un reconocimento mundial y desde e tempo ey Aruba ta conoci pa ta un di e paisnan cu tambe ta participa activamente na e ‘Earth Hour’ cual ta demonstra cu e comunidad di Aruba ta para hunto y ta duna un aporte valioso na e evento aki. Ademas, Aruba tin un comision, Earth Hour Aruba Community Group (E.H.A.C.G.) pa yuda concientisa e comunidad Arubano pa cu e importancia riba sostenibilidad di energia.
Mescos cu tur aña ta pidi pa Aruba uni pa e bon causa aki y mustra mundo cu nos destinacion tambe ta contribui na e evento global di ‘Ora di Planeta’ pagando tur e luznan y aparatonan electrico no escencial durante un ora riba diasabra 27 di maart 8:30 pm pa 9:30 pm.
Mas cu 160 pais mundialmente ta wordo pidi pa paga nan luznan pa un ora largo of mas. Pues di e manera aki Oficina di Turismo tambe ta participa na e tremendo accion ambiental y luznan no esencial na nan edificio pero tambe paden di e edificio cu normalmente ta keda cendi anochi lo wordo paga. Na e forma aki, A.T.A. ta apoya iniciativanan sostenibel pa nos futuro generacion y un Aruba duradero.
E conscientisacion aki ta algo cu tur hende por haci –no solamente durante Earth Hour, pero diariamente, por ehempel: no cende luz innecesario, saca tur plug di charger ora caba di charge. No laga airco cendi innecesariamente.
Esaki ta un yamada pa tuma responsabilidad pa nos medio ambiente, pues participa na paga luznan pa un ora of mas, comparti e accion aki na sea un bon ehempel pa otronan y celebra Bo impacto!