Departamento di Asuntonan Economico, Comercio y Industria/IDEA, ta ofrece un curso pa tur empresarionan of futuro empresarionan cu kier siña maneha
un negoshi eficientemente
ORANJESTAD – Dia 12 di april proximo Iniciativa pa Desaroyo di Empresa Arubano (Idea) ta presenta su curso “Empresario Prepara I” organisa pa Departamento di Asuntonan Economico, Comercio y Industria. Meta di e curso ta pa yuda nos clientenan maneha nan negoshi of negoshi di otro persona den un forma mas eficiente y manera mester ta.
E curso ta consisti di e siguiente topiconan:
Corporate Social Responsibility (Business & Human Rights)
Business Continuity Plan
Marketing
Business Plan
Business Law
Small Business Administration & Finance
Empresario Prepara lo cuminsa dia 12 di april 2021 y ta consisti di 25 les (dos biaha pa siman, teniendo cuenta cu e dianan liber den luna di april). E curso lo termina dia 12 di juli 2021. Horario ta 7.00 pm pa 9.15 pm y pa e lesnan lo tin un schedule cu lo mester tene cuenta cune. Lo duna e curso riba e plataforma di ZOOM.
Curso “Empresario Prepara I” ta costa Afl. 375,-. Mester completa tur e fasenan pa por logra un certificado na final.
Pa e personanan cu tin curso EP I caba y ta desea pa participa na e 2 topiconan nobo cual ta “Corporate Social Responsibility” y “Business Continuity Plan”, por haci esaki tambe na un prijs di 60,- pa tur 2 topico y lo ricibi un certificado si logra pasa e examen cu exito.
Criteria pa atende curso “Empresario Prepara I”:
Ta preferibel pa tin nivel di MAVO of equivalente. Diploma no ta necesario.
Mester tin conocemento di computer y di e plataforma ZOOM.
Conocemento basico di Papiamento, Hulandes y Ingles ta necesario.
Pa informacion y inscripcion por yama oficina di IDEA na 521-2439/521-2440/521-2400