Home Politics Minister Xiomara Maduro a duna reconocimiento na miembronan di e prome...

Minister Xiomara Maduro a duna reconocimiento na miembronan di e prome Comision Himno y Bandera

SHARE

Enconexion cu Celebracion 45 aña Dia di Himno y Bandera

Un danki special tambe na esnan cu no ta cu nos mas

ORANJESTAD – Pa por a prepara e ceremonia di Inauguracion di Nos Himno y Bandera, a instala un comision cu a haya e nomber Comision Himno y Bandera. E comision mester a prepara y coordina henter e evento aki cu a tuma luga den Wilhelmina Stadion, awe Guillermo Prospero Trinidad. E comision a sa di cumpli cu nan tarea y pone un base con pa traha y desde e tempo ey, e comision aki tabata encarga pa organisa e celebracion di dianan nacional, ‘Dia di Himno y Bandera’ y despues tambe ‘Dia di Betico’. Miembronan cu a bini despues den e comision tambe a cumpli cu nan tarea y hopi tambe ta e boluntarionan cu a yuda den e trabaonan cu mester a wordo haci tur e añan cu a pasa. 

E prome comision encarga cu organisa e evento pa inaugura nos Himno y Bandera a wordo reconoci, den un evento cu asistencia masha limita pa motibo di e pandemia, pa Minister Xiomara Maduro di Cultura den un ceremonia special na ocasion di e 45 aniversario di nos Himno y Bandera. Minister Maduro tambe ta recorda tur miembro cu no tey mas cu nos y ta gradici nan y nan famia pa nan aporte y contribucion. Igualmente e mandatario ta contento di por a conta cu presencia di sr. Juan ‘Epi’ Wever cu a fungi como secretario di e comision, sra. Maybeline Arends-Croes cu te dia di awe ta miembro honorario di e Comision Celebracion Dianan Nacional, sra. Alice van Romondt y sr. Tai Kim R. (Atan) Lee, kendenan tambe a forma parti di e comision aki. Reconociendo e prome miembronan cu ainda ta cu nos, di e forma aki tambe ta reconoce e trabao haci pa tur esnan cu durante 45 AŇA a forma parti di e comision aki. Minister Xiomara Maduro durante e acto special aki a yama danki na cada uno pa nan gran aporte y dedicacion desde un principio cu nan a haya e tarea pa por prepara e celebracion di inauguracion di nos Himno y Bandera.