Home » Den su discurso den e Congreso virtual di “Global Summit of Women”: PROME MINISTER A ENFATISA CU HENDE MUHENAN TIN E CAPACIDAD PA LIDERA DEN BON Y DEN MAL TEMPO

Den su discurso den e Congreso virtual di “Global Summit of Women”: PROME MINISTER A ENFATISA CU HENDE MUHENAN TIN E CAPACIDAD PA LIDERA DEN BON Y DEN MAL TEMPO

by Admin
0 comment 47 views

 

Prome Minister Evelyn Wever-Croes un biaha mas tawata un orado na e 

Congreso virtual di “Global Summit of Women” cu a tuma luga diamars mainta na unda varios lider femenino di diferente pais a participa. Prome cu su discurso, Premier Wever-Croes a tuma e oportunidad di gradici Irene y e comision organisado pa e invitacion aki na unda cu e por a comparti e efecto di e pandemia riba pais Aruba pero en especial riba e ser femenino. 

 

Durante su discuro, Prome Minister a toca diferente topico entre otro e pasonan cu Aruba mester a tuma como resultado di e pandemia aki, e efecto riba e ser femenino compara cu e ser masculino, y e importancia pa mantene e trabou cu a bin ta haciendo pa fortifica e posicion di hende muhe y pa sigui brinda e hende muhe oportunidadnan pa desaroya. 

 

A causa di e pandemia di Covid-19, Aruba a ser confronta cu un situacion di emergencia socio economico agudo na unda salud di e comunidad tabata na prome luga resultando asina cu Aruba mester a bay den un “lockdown” temporario. Mirando Aruba su dependencia riba turismo, e lockdown aki tabata devastador ocasionando cu e porcentahe di desempleo a subi drasticamente. Lamentablemente a nota cu esnan mas afecta tabata e hende muhenan ya cu e porcentahe di hende cu a perde trabou ta mas halto entre e hende muhenan cu entre e hende hombernan. 

 

Prome Minister a splica cu apesar cu e hende muhenan a sa di desaroya nan mes hopi ultimo añanan semper a keda bareranan impediendo asina e ser femenino di logra nan maximo potencial como lider di nacionnan. E pandemia aki a sa di mustra cu e avansenan haci pa nos hende muhenan ta fragil y ta refleha e retonan cu e ser femenino a enfrenta. Hende muhenan rond mundo a wordo afecta mucho mas door di e pandemia den termino di perde trabou, tuma dianan sin pago pa por cuida nan yiunan pa motibo cu scolnan a cera, violencia domestico a subi, traha di cas mientras tin cu cuida famia y cuida nos grandinan durante e lockdown. 

 

Prome Minister Wever-Croes a menciona e importancia pa bin cu esfuersonan explicito pa mitiga e impacto cu e pandemia aki a trece riba e posicion di hende muhe haciendo igualdad di genero un parti integral di e recuperacion mundial. Ta importante pa e ser femenino bin bek den e mercado laboral pa asina por continua riba e ruta di independencia economico creando asina mas oportunidad pa hende muhenan den posicionnan di liderazgo. 

 

Durante e conferencia aña pasa, Premier Wever-Croes a menciona cu e ta un fiel creyente den e retonan cu “good governance” por evita y cu pa e motibo aki e como Minister President di Aruba ta lidera e pais cu integridad, contabilidad y inclusion di un y tur. Adicionalmente e ta busca conseho di expertonan, semper ta transparente comunicando abiertamente. 

 

Por ultimo Prome Minister a menciona cu e lo kier wak mas hende muhe postula nan mes den politica y sinta na mesa. Mirando e reto di por a lidera un pais den e peor crisis cu Aruba a conoce, Prome Minister ta spera di por tabata un inspiracion pa otro hende muhenan y e proximo generacionnan pa por considera tuma un stap den politca. 

 

“Nos como hende muhenan tin e capacidad pa lidera den bon y den mal tempo. Nos mester realisa cu nos tin un rol importante den cambia nos comunidad y mantene principionan democratico fuerte pa por introduci enfokenan inclusivo. Nos no mester wordo descurasha, e mundo aki mester di nos mas cu nunca pa tuma e liderazgo y drecha tur loke e crisis aki a daña,” Prome Minister a termina bisando. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio