Panamastraat, Oranjestad:
Dialuna den careda di 5’or di atardi, un biaha mas presencia di polis a wordo pidi na un cas den Panamastraat, un adres ya conoci pa polis. Esaki pa motibo di un problema entre doño di cas y un hoben cu ta kedando na e cas.
No ta prome biaha, pero constantemente ta pidi pa presencia di polis na e adres aki. E hoben ta un adicto, conoci di polis, cada biaha e homber ta core e hoben aki for di su cas y despues pa un otro motibo nan ta bolbe haci paz y e hoben ta bolbe bay biba na e cas.
Na varios ocasion polis a yega di atende cu e doño di e cas y e hoben aki, pero tur cos ta keda mescos. E doño di e cas ta sigui acepta e hoben adicto aki bek den su cas y ora e hoben bringa cu ne, e doño ta bolbe yama polis pa sak’e afo di su cas.
Dialuna atardi, un biaha mas a start un problema den e cas, e hoben a bira razo y a cuminsa kibra cos den cas. E homber, doño di e cas a yama polis y pa di e tantisimo biaha polis a bay na e cas, pa intermedia den nan problema. Polis a papia cu tur dos y e hoben a bandona e cas. Ban wak pa cuanto tempo, e homber y e hoben adicto lo keda rabia cu otro.
