Home » Parlamentario Rocco Tjon (MEP): Fraccion MEP a reuni cu Gerencia di Elmar N.V.

Parlamentario Rocco Tjon (MEP): Fraccion MEP a reuni cu Gerencia di Elmar N.V.

by Admin
0 comment 70 views

Siman pasa nos a reuni cu gerencia di Elmar. Un reunion sumamento positivo, caminda a haya un splicacion amplio riba diferente punto. Entre otro a trata (1) e situacion financiero di e compania, (2) proyecto di “grid” y “smart meter”, (3) e desaroyo di energia solar, (4) e impacto cu e pandemia tin riba e compania y (5) tambe e areanan di enfoke pa 2021-2024.

Cantidad y tipo di meter
Elmar ta e distribuidor exclusivo di electricidad na Aruba for di 1950 y tin mas cu 50 mil meter pega na Aruba. E diferente meternan ta categorisa entre residencial (47.406) y Comercial (4882). Den e categoria di comercial tin un distincion ta wordo haci entre “small” y “large”. Y akinan por wak cu e 50 clientenan grandi den e categoria aki, cual ta e hotelnan, nan consumo ta mas o menos un tercera parti di e total na Aruba.

Impacto di COVID
Mirando e uso significante di e hotelnan y dependencia di e entrada aki e impacto tabata grandi pa e situacion financiero di e compania. Na 2020 a señala un rebaho den benta di 82%, compara cu e aña anterior. Gerencia di Elmar a splica cu nan ta premira cu entre 3 pa 5 aña e compania lo “recover” por completo. Na 2024 lo yega bek na e nivel di 2016 qua benta di kwH. Pa mitiga e impacto financiero aki tin diferente proyecto cu a wordo posponi y tambe interno mes den e compania a haci difderente ahuste. Tambe clientenan por a yega na un areglo di pago cu Elmar y hasta cu e posibilidad di bay over pa meternan pre-pago na unda e cliente mes por educa su mes ariba con pa maneha e uso di coriente concientemente.

Areanan di enfoke 2021-2024
Un di areanan di enfoke cu sigur a resalta ta cu gerencia a indica cu lo bay percura pa e compania bira aun mas eficiente. Den cuadro di esaki lo optimalisa y evita gastonan innecesario, percura pa operacionnan mas eficiente y asina elimina gastonan excesivo. Pero di otro banda lo sigui mehora e calidad di e portfolio di Elmar. Esaki door di percura pa mantencion structural y digitalisacion di e “grid”. Tambe lo continua y amplia e “smart meter project & smart sensors”.

Ilumincacion di caya
Un proyecto tambe cu ta hayando su debido atencion aworaki ta esun di iluminacion di caya cu ta den man di DOW. Prome Minister sra. mr. Evelyn Wever-Croes a indica algun tempo atras, cu ta den deliberacion pa esaki por pasa por completo pa Elmar. Di e forma aki na un manera planifica y structura tur area na Aruba lo bay haya e iluminacion necesario pa entre otro eleva e seguridad.

Pa conclui
Fraccion di MEP ta wak bek riba un reunion hopi informativo y nos ta gradici Gerencia di Elmar pa e informacion brinda. Alabes tambe ta deseanan exito cu ehecucion di nan proyectonan den e diferente areanan di enfoke.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio