Durante un programa na Massive 103.5 FM, Prome Minister y Minister di Asuntonan General, sra. Silveria Jacobs y Minister di Husticia, sra. Anna Richardson di Sint Maarten a duna varios mensahe positivo en conexion cu ‘Women’s History Month’. Ambos minister a conta di nan experencia den politica como hende muhe Caribense y con nan ta maneha nan tempo, famia y e responsabilidad pa ta na encargo di nan pais.
E ministernan a comenta riba e importancia pa educa mucha muhe y hobennan riba tur e opcionnan cu ta disponibel pa nan awendia riba tereno di trabow. Prome Minister Silveria Jacobs ta di opinion cu e hende muhe por ‘do it all’ y nunca mester limita su mes, den ningun forma. Segun Prome Minister Jacobs ta importante pa cada hende muhe cultiva amor propio, y pa nan forma parti di un circulo di hende muhe cu ta sostene y empodera otro. Amiganan cual por comparti ideanan constructivo cu otro y cu por yuda otro ora cu tin mester. Minister Jacobs a comenta tambe, cu ta importante pa relaha y recarga, sea den forma di ehercicio of meditacion, pa por tin e energia pa traha y sirbi e pais debidamente.
Minister Anna Richardson a comparti su pasion pa mira Sint Maarten progresa. Como e prome minister di husticia femenino den historia di Sint Maarten, e lo kier mira mas hende muhe y hende homber asumi e responsabilidad pa haci un diferencia den nan propio comunidad. Minister Richardson a mustra e importancia di tin un mentor y a expresa su gratitud na e Prome Minister Jacobs, cu ta fungi como un mentor pa su persona. Minister Richardson a conclui e entrevista cu un yamada na hende muhe pa considera nan escohencia di estudio of trabow bon, y scoge pa un carera cu ta na beneficio di comunidad henter. ‘Nos tin mester di personanan positivo pa haci un diferencia y pa contribui na e progreso di nos pais.’
E grabacion di e entrevista aki ta disponibel riba e Facebook page di MassiveAruba cu hopi mas tema interesante di ambos invitado. E carismatica Francie Celaire, conoci den mundo di produccion di television, radio y evento y tambe como publicista, a haci su debut como presentadora durante e entrevista cu a wordo conduci Live via online video streaming riba Facebook y tambe na radio. Pues, e damanan por a mira otro riba pantaya y hiba un conversacion ameno, compartiendo storia y consehonan for di nan propio experencia como hende muhe den posicion di liderazgo, particularmente durante temporada di COVID-19.
