E resultado di elekshon Hulandes di 17 mart 2021 ta papia palabra kla ku e pueblo Boneriano no ta kontentu. Esaki ta un“rechazo di gobernashon Hulandes” indiskutibel. E resultado di diarason ta mustra un mensahe kla pasobra for di 13490 hendenan ku tabatin derecho di vota, ta solamente 3076 so a bai urna representando 22%. 10414 votadonan malkontentu no a bai vota. E ultimo elekshon di 2de kamer di 2017 tabata meskos ku 77% no a vota I meskos tabata na 2012 e resultado tabata similar 76% no a vota. Nos Ke Boneiru Bek su kampanja: “ No bai vota” manera semper tabata determinante den e viktoria kaminda un biaha mas ku e pueblo a uni aunkue ku nan ta di diferente partidonan politiko, nan a uni I demonstra nan malkontentu I ninga di tuma parti den e farsa di demokrasia aki.
E elekshon aki ku a wordu impone riba e pueblo Boneriano ta un burla o farsa di demokrasia pa nos pueblo pasobra ta mes un parlamentu Hulandes aki, 2de kamer a ankra nos den nan konstitushon sin derecho igual ta konsisti di 150 asiento situa na Den Haag, kaminda nan tur a bai di akuerdo ku e akto kriminal kontra nos pueblo. Pa un asiento mester di mas o menos 60 mil voto I na Bonaire tin 13 mil hende ku derecho di vota I nos no tin niun chens matematiko. Mas imposibel ta pa kambia Konstitushon Hulandes bek nan nos fabor pa duna nos derecho igual, nos mester dos-tersera (2/3) di e parlamentu Hulandes, ku ta 100 asiento pa bai di akuerdo pa kambia esaki bek. I no solamente den un periodo di gobernashon pero den dos diferente elekshon I periodo di gobernashon e 100 miembronan di parlamentu o 2de kamer Hulandes mester bai di akuerdo ku esaki.
E partidonan politiko MPB, UPB I DP nan lidernan prominente, lidernan di sindikato di Bonaire, I otronan, tur agresivamente a promove na gran eskala via televishon, radio I aviso den korant. Un kampanja di elekshon hopi elabora I kostoso nunka bisto na Boneiru na fabor di partidonan politiko Hulandes ku nan tin aliansa ku ne na Hulanda. Nan tur a kere ku e biaha aki lo tabata diferente pero nan tur a keda ku berguenza pa motibu di partisipashon hopi abou. E resultado ta un rekordatorio fuerte ku e pueblo no a skohe pa intergrashon I ku nan a wordu forsa den un aneksashon illegal.
E parlamentu Hulandes, 2de kamer, a aneksa e islanan BES, inkluyendo Bonaire riba 10 oktober 2010 I a elimina e derechonan demokratiko di e pueblo Boneriano. Desde 10.10.10 e parlamentu o konseho insular di Bonaire, skohe demokratikamente pa pueblo Boneriano a wordu sub-ordina bao di gobernashon I ley Hulandes I a start ku un tipo di gobernashon kolonial institushonalisa di siglo 21 riba nos pueblo. Na oktober 2017 e parlamentu I gobiernu Hulandes unilateralmente pa medio di un ley no-demokratiko a kompleta e aneksashon illegal dor di entegra e pueblo Boneriano sin derecho igual den konstitushon Hulandes degradando nan na nivel di suidadanonan di segundo klase den un forma nobo di apartheid den Reino Hulandes I mundu. E pueblo Boneriano desde e tempu ey ta wordu goberna den un status ku e no a skohe, sin derecho igual, un status ku un rechazo abrumador, un voto No desisivo di e pueblo den referendum di 2015.
Nos fundashon Nos Ke Boneiru Bek su kampajanan konsistente di konsietisashon a duna resultado, I a para firme, pasobra e pueblo no a bai tras di e kampanja manipulativo den media di nan lidernan, ku por wordu konsidera traidor di nan mes pueblo. E pueblo Boneriano a para firme I a reskata su dignidat, pasobra mas ku 77% di e elektorado a protesta pa medio di e akshon di no-vota kontra di e invashon I okupashon Hulandes di Boneiru. Nos Ke Boneiru Bek lo kontinua traha diligentemente riba nos trajektoria pa pone Bonaire bek riba lista di teritorionan-sin-propio-gobernashon di Nashonan Uni.
James Finies – Nos Ke Boneiru Bek