Home Politics Prome Minister Evelyn Wever-Croes: PROME MINISTER TA FELICITA PARTIDONAN GANADO DEN...

Prome Minister Evelyn Wever-Croes: PROME MINISTER TA FELICITA PARTIDONAN GANADO DEN ELECCIONNAN PARLAMENTARIO DEN REINO HULANDES

SHARE

“Nos ta mira padilanti pa un relacion fructifero cu cualkier gobierno cu keda forma tanto na Corsou como na Hulanda”

Siman pasa a tuma luga elecionnan pa miembronan di Parlamento den Reino Hulandes. Diaranson a tuma luga eleccion na Hulanda y diabierna na nos hermana isla Corsou. Pa e ocacionnan aki, Prome Minister Evelyn Wever-Croes, den nomber di Gobierno di Aruba, a felicita Mark Rutte y su partido VVD. Partido VVD a aumenta den porciento y a mantene su posicion como e partido mas grandi na Hulanda apesar cu nan mester a goberna durante un periodo hopi hopi dificil cu ta e crisis di e pandemia di Covid-19 cu tin nos tur mas di un aña caba ocupa.

Tambe prome Minister a felicita e partido D66 lidera pa Sra Sigrid Kaag cu a crece bastante den asiento birando e di dos partido mas grandi na Hulanda. “Mirando cu ta un ser femenino ta lidera e partido ta merece un extra felicitacion”.
Prome Minister, den nomber di Gobierno di Aruba a felicita partido MFK di Corsou tambe lidera pa señor Gilmar Pisas kende tambe a logra un resultado imprecionante cu 9 asiento na Corsou. Tambe un caluroso pabien na partido PNP lidera pa sra. Ruthmilda Larmonie Cecilia cu a logra 4 asiento.

“Mi por compronde cu e dos partidonan aki a expresa nan interes pa traha cu otro pa asina forma e siguiente gobierno pa e isla di Corsou. Mi ta desea di gradici partido PAR lidera pa Premier Eugene Rhuggenaath y partido MAN lidera pa Minister Steven Martina kendenan bou di circumstancianan hopi dificil a sa di lucha pa nan isla memei di e crisis di e pandemia cu a afecta Corsou tambe.

Nos ta desea hopi exito y sabiduria na e partidonan ganado cu awor mester bay forma nan respectivo gobierno. A nos na Aruba ta mira padilanti pa un relacion fructifero cu cualkier gobierno cu keda forma tanto na Corsou como na Hulanda. Nos ta cla pa continua e cooperacion y traha hunto den bienestar di nos pueblonan en general y di Aruba en especial”, Prome Minister Evelyn Wever-Croes a expresa.