Kuerpo polisial a tuma nota den fin di siman di un video ku ta sirkulá, di un persona ku ta kana bai ku un kachó na kosta nòrt di Kòrsou i despues di a deshasà di e animal aki, ta regresá.
Un akto sumamente lamentabel i di kondená, ku sin duda polis lo no keda sin aktua kontra di dje.
Ya kaba a asigná algun personal pa investigá e kaso aki i huntu ku Ministerio Públiko lo prosesá esun ku a hasi su mes kulpabel na e echo repudiabel aki.
Kuerpo Polisial ke enfatisá ku maltrato di bestia ta kontra di lei, pa kua violashon tin kastigu di prizòn.
Polis ta spera ku e sospechoso den e kaso aki, lo sa di entregá su mes na kualke warda di polis i asina para responsabel pa su akto.
Sinembargo un apelashon ta bai na tur esnan ku tin informashon di e kaso partikular aki, pa tuma kontakto ku polis na e number 917 òf 108 si bo ke keda anónimo.
