Awe mainta trempan a sali e di shete vuelo humanitario di regreso boluntario pa Venezuela. Un total di 142 persona mayor di edad a regresa awe riba e vuelo pa Venezuela, di cual un parti substancial tabata forma parti di e maneho di regreso boluntario. Na mes momento un grupo di 68 persona a wordo deporta base di e Ley di admision y expulsion (‘LTU’).
E maneho di regreso boluntario ta delinea pa minister di Husticia mr. Andin Bikker den cuadro di e pandemia ocasiona dor di e Coronavirus. E maneho a resulta masha exitoso cu un acogida positivo y hopi grandi cerca centenares di persona, cu den bista di e pandemia a opta pa regresa nan pais boluntariamente.
Entretanto tabatin vuelonan den cuadro di e maneho pa entre otro Argentina, Ecuador, Colombia, Haiti, Panama, Guyana, Santo Domingo, Peru, Venezuela y via Hulanda pa varios otro paisnan den Europa.
Minister Bikker a gradici tur instancia cu a haci esaki posibel, entre otro DIMAS, IASA, Guarda nos Costa, Directie Luchtvaart, Directie Buitenlandse Betrekkingen, Directie Volksgezondheid, y e Crisisteam di Covid19.
——