Home Politics Hendrik Tevreden (Presidente di MEP): MEP keto bay ta manteniendo...

Hendrik Tevreden (Presidente di MEP): MEP keto bay ta manteniendo reglanan y protrocol di Covid na tur evento publico.

SHARE

 

 

Como presidente di e partido mas grandi pa eleccion 2021, MEP, mi kier a asegura e comunidad di Aruba cu keto bay nan ta aplicando tur e reglanan contra Covid na tur evento publico organisa pa partido MEP. Como organisacion nos ya caba tin un cantidad di workshop y evento tras di lomba unda nos ta amplia ariba diferente materia, manera finansas, communicacion, estado di derecho, y mas, cu tin un gran acohida y interes den nos comunidad. Sinembargo nos ta limita e cupo di participante, pa evita aglomeracion y pa duna ehempel y cumpli cu e reglanan contra Covid-19.

 

A hisa bandera di mas grandi na Aruba
Dia 17 ultimo, atrobe a cumpli cu e reglanan contra Covid-19, ora cu a hisa e bandera mas grandi di Aruba na cede di MEP. Un custumber cu sr. Harry Croes semper a carga cu ne, y cu MEP semper lo continua cu ne, cu semper a sa di atrae un gran publico. Sinembargo e biaha aki partido MEP a scoge pa celebr’e diferente pa evita cu tin un aglomeracion mucho grandi na cede y kibra e reglanan estableci contra Covid-19 pa gobierno di Aruba.
Cu esaki MEP ta demostra y por ta un ehempel pa otronan cu bo por haci actividadnan sin cu bo ta kibra reglanan!

 

No ta tur partido ta cumpli
MEP por a tuma nota cu no ta tur partido politico ta sigui e bon ehempel aki, y ta trece nan mes y otro ciudadanonan den peliger di contagio, sin cu esaki ta necesario. E ta un falta di respet na comunidad cu nos ta mira ex dignatarionan ta kibra tur regla y cu ta autoridad policial tin di cay aden pa hala nan atencion ariba e peligernan y e forma iresponsabel di nan comportacion. Como president di MEP mi kier haci un apelacion na tur otro partido politico pa sigui nos ehempel y mantene nan mes na e reglanan contra Covid-19 pa asina evita cu nos lo mira crecemento di casonan di Covid riba nos pais.

Conclusion

Aruba ta riba e bon caminda pa recuperacion, y no por permiti pa ningun afan politico stroba Aruba di sigui crece y recupera di e crisis aki. MEP kier gradici tur su miembronan y comunidad cu si ta mantene nan mes na e reglanan y protocol contra Covid-19, y ta haci un apelacion grandi, special na esnan cu ta preparando pa eleccion 2021 pa actua responsabel y uni na e recuperacion di pais Aruba su crecemento y salida di e pandemia aki.