Oranjestad:
Pa mas cu un aña caba, mundo henter incluyendo Aruba, ta den un pandemia y manera tur otro pais na mundo Aruba tambe ta tratando na controla y frena e contagio di Covid-19, pa e no bay for di man. Den un aña di tempo 81 persona a fayece di Covid-19 na Aruba y e situacion ta hopi serio, tur cos ta indica cu nos ta drentando un otro ola nobo di contagio.
Aña pasa na comienso di e pandemia, gobierno a institui un crisisteam y poco poco a keda introduci diferente medidanan pa asina trata di frena y controla e contagio di Covid-19.
Lastimamente cu riba dia di Himno y Bandera tabata mustra mescos cu hopi hende ya caba a lubida cu nos ta den pandemia, cu nos ta den un situacion precario y cu nos tur mester cuida.
For di oranan di merdia varios unidad di polis tabata man yen cu asistencia, tambe constantemente mester pasa controla establecimentonan manera bar, restaurant etc. cu si nan ta manteniendo nan mes na e reglanan stipula pa Gobierno di Aruba. Hopi hende riba caya, mayoria sin mondkapje, nan tabata aglomera y no tabata mantene nan mes na e reglanan vigente.
Durante oranan di atardi pa anochi, e problemanan a cuminsa escala. Polisnan a hayanan confronta cu e motociclistanan cu tabata core den grupo, nan tabata para hunto riba parkeerplaats cual ta cay bou samenscholing y esaki ta prohibi. E polisnan tabata core nan for di un sitio y nan tabata bolbe bay aglomera na un otro.
Riba e parkeerplaats di DAO, banda di e establecimento Bochincha, varios biaha polis mester a bay core cu grupo di hende para eynan, esaki te den oranan laat di anochi. Polis tabata duna nan un chens di bay den e establecimento of bay for di e sitio paso algomeracion ta prohibi.
Varios caminda por a mira hendenan riba caya of na establecimentonan, sin mondkapje, para den grupo. Polis cada biaha mester bay hala nan atencion, te hasta mester a bay over na cera un establecimento cerca di Willem de Drie Toren, pa motibo cu polis a bay e prome biaha y avisanan pa nan cumpli cu e reglanan, pero di dos biaha ora cu polis a pasa controla nan a nota cu e hendenan no ta mantene nan mes na e reglanan y a dicidi di cera e luga.
Polis no solamente tabata controla establecimentonan, parkeerplaats etc. pero Polis mester a atende tambe cu varios bringamento, chauffeur burachi, boksmento etc. un dia hopi ocupa pa Cuerpo Policial di Aruba pa trata na mantene orden publico.
