ORANJESTAD –Sentencia a cay den e caso penal cu Ministerio Publico a cuminsa contra e homber M.D.G., kende a tira e homber C. den bariga. Esaki a sosode via video conference caminda e preso ta den KIA mientras cu den sala di Corte tabata Hues, Fiscal y abogado.
Aruba Native por a compronde cu Hues a bisa cu mescos cu Fiscal, e no ta haya proba e acusacion di intento di atraco y tampoco e acusacion di intento asesinato.
Hues a sigui bisa cu e tampoco ta haya proba e acusacion di intento comete lesion severo y maltrato. Na opinion di Hues, for di e investigacion cu a tuma lugar den sala di Corte, no por prueba e intension.
For di investigacion ta sali na cla cu M.D.G. a wak C., kende debe placa, pasa den un auto y a sigui su tras. Ora cu C. a para su auto pa papia cu un persona, M.D.G. tambe a para su auto y a baha pa bay papia cu C. M.D.G. tabata arma y a habri e porta banda di pasahero. C., kende sa pakico M.D.G. ta habri e auto, a sera esaki. M.D.G. a bolbe habri e porta y a pone su pia pa asina C. no por sera e porta. M.D.G. a drenta den e auto. Na opinion di Hues, no ta cla kico a pasa. El a bisa cu tin diferente version. Un version ta cu C. lo a core bay y dal cu e auto y M.D.G. su arma a cay. A surgi un luchamento pa e arma y accidentalmente C. a sufri un tiro den bariga.
Hues a bisa cu e no ta kere M.D.G. cu a bisa den Corte cu e no tabatin un arma. Hues a mustra cu e persona cu tabata papia cu C. na e auto, a mira M.D.G. cu un arma. Admas e amiga di M.D.G. a bisa cu M.D.G. a cont’e cu tabatin un luchamento den un auto y a tira un hende.
Hues a mustra cu C. mes a duna 3 version kico a sosode. Segun C. ora M.D.G. a drenta den e auto, C. a core e auto, accidenta y M.D.G. lo a saca arma los diferente tiro y un a herid’e. Tambe C. a declara cu M.D.G. a bis’e wak y a saca e arma y tir’e den bariga.
Den Corte C. a bisa cu M.D.G. a pone e arma na su bariga y tir’e. Pa Hues, tin duda kico realmente a pasa. Hues ta haya M.D.G. culpable di a tira y tabatin un arma di candela. Hues a conden’e na 2 aña di prison di cual 6 luna ta condicional cu un tempo di prueba di 2 aña.