E aña aki, riba dia 8 di mei 2021, Stichting Reclassering en Jeugdbescherming ta cumpli su di 60 aniversario. Durante e ultimo decadanan, e fundacion a duna servicio na nos comunidad y a logra realiza varios proyecto importante riba tereno di reintegracion y raportacion na Ministerio Publico.
E organisacion a scoge pa celebra den un forma solidario cu nos comunidad. Na lugar di inverti den un celebracion festivo, nan meta ta pa duna bek na esnan cu ta den necesidad. Pa celebra nan 60 aña, e organisacion a lansa un recaudacion di fondo, pa na final di 60 dia por yuda 60 hoben.
For di nan experencia di trabow extenso, Stichting Reclassering en Jeugdbescherming por conclui cu un grupo particularmente vulnerabel den nos comunidad, ta e grupo di hoben nan cu ta cambia di scol primario pa scol secundario. Hoben nan entre 11-13 aña di edad, cu ta sali for di e seno protegi di basisschool, pa un mundo mas independiente y cu mas influencia externo.
Mirando e situacion di pandemia y e adaptacionnan cu a wordo haci relata na ‘distance learning’, mayoria scol secundario ta exigi of recomenda pa cada studiante tin nan mesun laptop. Esaki no ta facil pa tur famia logra y pa e motibo aki Stichting Reclassering en Jeugdbescherming kier brinda 60 hoben cu ta den necesidad, e tecnologia necesario pa drenta e fase aki di nan bida di forma mas stabiel posibel.
Pa yega na e suma necesario pa por haci esaki posibel, Stichting Reclassering en Jeugdbescherming ta organisa un recaudacion di fondo y ta haci un apelacion na comunidad henter, ciudadanonan y companianan, pa contribui den forma di un donacion prome cu dia 8 di mei 2021.
Conhuntamente cu directiva di scolnan basico, e organisacion lo haci un seleccion di hoben cu di berdad mester di e ayudo. E identidad di e hobennan y e identidad di nan famia lo permanece anonimo pa publico.
Stichting Reclassering en Jeugdbescherming ta aprecia cualkier suma di donacion pa por alcansa e meta comunitario aki. Ta keda na cada persona pa dicidi cuanto nan por contribui. Donacion por wordo haci riba e siguiente cuenta bancario:
Stichting Reclassering en Jeugdbescherming – Caya Ernesto Petronia 21c – CMB 61178310 – Descripcion: 60 aniversario.
Pa mas informacion of pregunta, por tuma contacto na 582-1496 of por manda un e-mail [email protected].