ORANJESTAD -Despues cu aña pasa e pandemia di Covid-19 a toca Aruba tambe, nos a ripara con importante awa ta pa preveni plamamento di un virus. Uzando awa pa cuida nos mes y otronan di contagio.
En conexion cu Dia Internacional di Awa, dia 22 di maart, Directie Natuur en Milieu (DNM) ta aporta puntrando e comunidad: “ki balor abo ta duna na awa?” DNM kier comparti y contribui cu informacion relaciona cu importancia di awa y asina conscientisa un y tur riba e tema di e balor cu awa tin.
Nacionnan Uni (UN) a proclama e dia aki un dia di observacion mundial cu enfoke riba e importancia di awa potabel. P’esey awe nos ta refleha riba importancia di awa y con nos mester ta responsabel cu e recurso aki. Cada un di nos tin nos mesun storia of nificacion di “e balor di awa”. E dia aki ta pa e conscientisacion di e scarcedad di awa tambe pa 2.2 billion di hende na mundo cu no tin acceso na awa di calidad saludabel.
E subdepartamento, UN-Water, a saca un mandato mas directo pa su miembronan y partnernan pa referi na e crisis global di awa. Riba e dia aki tambe UN ta publica e rapport yama UN World Water Development Report cu tambe ta referi na e topico di e campaña, como tambe e direccion cu e maneho mester sigui pa asina logra e meta di desaroyo number 6. Awa limpi (SDG#6 Clean water and sanitation) dirigi na esnan cu ta tuma decisionnan den cuadro di esaki.
Na Aruba, DNM durante 2018 a traha conhuntamente cu otro departamentonan riba un raport di e SDG indicador pa awa (SDG#6) pa Aruba: Sustainable Development goals baseline measurement 2018. Na Aruba, 95.5% di nos habitantenan (Censo 2010) bibando den cas tin un conexion di meter di awa.
Awe e campaña proponi pa UN ta pa durante 2021 encurasha conversacionan y intercambionan di storia riba diferente plataforma, specialmente riba medionan social: “Con hende ta balora awa y su uzo”. E enfoke ta pa crea un comprondemento mas completo di e balor di awa pa diferente hende den diferente contexto. Asina nos por salvaguardia e recurso aki pa tur.
Abo tambe por comparti bo storia, pensamento y experiencia di e balor di awa. Bo por haci bo mes e siguiente preguntanan, asina bo por elabora riba bo storia y comentarionan:
- Kico awa ta nifica pa bo?
- Pakico awa ta importante pa bo?
- Con awa ta afecta hende muhe y hende homber, kico ta e diferencia?
- Ki rol awa tin den e practica di bo cultura?
- Ki rol awa tin den bo hogar, trabou of scol?
- Ki rol awa tin den bo futuro?
- Cua ta e cambionan cu bo kier mira pa loke ta trata e recurso awa?
- Pakico abo ta uza awa mas tanto?
- Con awa ta afecta bo cuminda?
Comparti cu nos bo storia y opinion tocante awa den bo bida riba Facebook uzando #Water2me #dnmaruba #WorldWaterDay
DNM ta uni na e yamada pa ta envolvi cu e tema aki y alabes ta recorda un y tur pa sea consciente di bo consumo di awa. Pero si teniendo na cuenta cu den e temporada aki ta importante pa keda laba man mas cu normal pa evita plamamento di e virus Covid-19.
Pa mas informacion di e tema di awa por bay riba worldwaterday.org of tambe Facebook pagina dnmaruba unda DNM ta comparti imagennan di e campaña “Balor di Awa”.