Oranjestad – Minister Xiomara Maduro ta informa cu door di hopi reaccion ricibi ta bay ripiti e programa tocante Proyeccion Economico, Economia Informal y Control di Prijs di e Serie di Programa ‘Aruba Fuerte y Resiliente’ – Reactivando nos Economia’.
Den e programa aki expertonan di Departamento di Asunto Economico. (DEACI) ta elabora riba e tres topiconan. Sra. Judesca Briceño, Hefe di seccion di investigacion economico ta duna un splicacion amplio tocante di e investigacionnan economico cu DEACI a haci pa yega na e perspectiva economico 2021. Sr. Jason Lejeuz, Funcionario di Maneho den e seccion di investigacion economico ta splica kico ta Economia Informal y ta elabora riba e investigacion cu e departamento a haci tocante Economia Informal. sra. Suhailah Maduro, Hefe di e seccion di implementacion di Maneho Economico ta elabora riba e maneho general di prijs di producto y ta splica tocante e Canasta Basico. Tambe e ta duna informacion riba cual productonan nan prijs ta wordo regula y ta splica tocante di e proceso di control di prijs.
Un invitacion ta bay pa sintonisa e programa aki diaranson dia 17 di maart 7’or di anochi na TeleAruba y riba pagina di facebook di Gabinete Wever-Croes.
