Home Dutch Kingdom Stanley Clementina ta presenta konsierto virtual ‘Trans Atlantic Connection’ ku Clifton End,...

Stanley Clementina ta presenta konsierto virtual ‘Trans Atlantic Connection’ ku Clifton End, Qshans i Remses Rafaela

SHARE

WILLEMSTAD – Kantante Stanley Clementina ta bèk ku un kolaborashon kreativo unda virtualmente e ta presenta un espektákulo musikal huntu ku su amigunan den farándula antiano. Apesar di e pandemia ku a afektá farándula mundialmente, Clementina ta uní forsa ku e talentoso vokalista Clifton End, Qushannick ‘Qshans’ Thode i rapper i bailarin Remses ‘MuisjeMuis’ Rafaela den e presentashon virtual ku ta tuma lugá día 20 di mart próksimo, riba e página di Facebook di Stanley Clementina.

Trans Atlantic Connection

Fo’i 2020, e evento aki tabata den tapara, pero e artistanan tur a opta pa warda riba e momento korekto pa uní forsa i trese e magno evento aki pa públiko. Durante e aña tras di lomba, Clementina a usa e tempu liber ku a presenta pa motibu di e pandemia, pa lansa diferente piesa ku a resoná na nos radionan i otro plataforma musikal. Ken por lubidá e infeksioso Kompa ‘Quarantaine’ i ‘Kompronde’ i e bunita piesa ‘No Tratami Asina’ i e homenage na Gibi Doran titula ‘Demostrá Bo’.

Clifton End tampoko a sinta ketu den 2020 i a deleita nos ku piesanan manera ‘Morena’ i ‘Kandela’, parti di e serie di seis kansion ku ta forma parti di e EP titula ‘Mi Pais’. Pa 2021, tambe tin hopi antisipashon pa Clifton su proyekto di ‘Soul’ nobo, regresando na su promé amor musikal.

Promé ku COVID 19, Qshans di su banda a estrena den e obra basa riba bida di e legendario Tina Turner, i tambe a kolaborá riba e piesa ‘Mas Mi Drai’ ku Ivanhoe Willems.

Remses ‘MuisjeMuis’ Rafaela a enfoká riba su produkshon musikal teatral pa mucha titula ‘Wijzer’ na Maas Theater, kual apesar di tur medida di COVID-19, a resulta di ta un éksito rotundo. E aña aki, Rafaela ta spera di por trese e obra musikal aki na tur mucha di Korsou, Aruba i Boneiru, kende asina por eksperensia un obra ku nan por identifika nan mes ku n’e.

‘Trans Atlantic Connection’ ta kompletamente gratis i lo kuminsa 3ór di atardi ora di Korsou, kual ta 8ór di anochi na Hulanda. Tur e hitnan favorito di kada kantante lo keda presenta durante e enkuentro musikal aki.