Un biaha mas Brazil ta kibra record den casonan di fayecimento y contagio di Corona virus. E cuido na e pais ta den crash. Lockdown no ta wordo implementa manera mester ta, vacunacion di personanan ta bayendo demasiado poco poco. Expertonan y tambe World Health Organization ta bati alarma: “Esaki no ta solamente Brazil”
Brazil den e un aña di e pandemia di Corona virus, a conoce diferente crisis di e virus aki, pero awo ta prome biaha cu casi ture districtonan di Brazil ta wordo marca den cora scur.
Mayoria di e 26 districtonan y e estado federal Brasilia, tur intensive care unit di e hospitalnan ta full of casi full yen. E cifranan di fayecimento y contagio tur dia ta aumenta cu recordnan nobo. Siman pasa como 10 mil persona a fayece di Covid-19 na Brazil, e cantidad aki a tur kibra record. Diariamente e cantidad di personanan contagia ta aumentando cu 65 mil persona.
Segun specialistanan ainda Brazil no a yega na e parti mas pio di e crisis. Segun Miguel Nicolelis: ” Corona ta desaroyando su mes como e desaster humano mas grandi di siglo 21″. Miguel Nicolelis ta un medico hopi conoci na Brazil, e ta un scientifico y un consehero riba varios area di prevencion di Corona.
E ta bin ta avisando for di januari caba, tocante e situacion precario di Covid-19 na Brazil. E sistema medico ta den collaps y e ta preocupa cu pronto e cantidad di morto lo por aumenta te na 3 mil persona pa dia. “E chens ta uno hopi grandi y realistico” segun Nicolelis. ” Si pa dia ta muri 2mil, of 3 mil persona. Den tres luna e cantidad lo ta entre 180 mil pa 270 mil.
Redoblacion di e cantidad actual di morto di Covid-19, lo por yame “genocidio”, djis cu niun persona no kier uza e palabra aki. E cantidad di 250 mil morto no ta necesario, un gran parti di e mortonan aki lo por a wordo preveni!
Nicolelis y hopi di su otro coleganan medico y un gran parti di e poblacion di Brazil ta puntando dede riba e presidente Jair Bolsonaro, pa motibo cu for di prome instante, e presidente tabata un persona cu no tabata kier a mira e peliger di Corona virus y tabata opone fuertemente contra cualke medida di Corona. Segun Nicolelis, “e presidente ta mustra cu no tin compassion pa e cantidad di mortonan creciente na e pais.”
E presidente no kier pa e economia di su pais sufri bou di coronacrisis. Vacunacion massal lo por yuda den esaki, pero esey tampoco e presidente no ta interesa pa haci. Desde augustus aña pasa e la nenga di cumpra un cantidad grandi di vacuna. Pa e motibo aki actualmente tin un scarsedad di vacuna na Brazil, cu te hasta e campaña di vacunacion cu mester a cuminsa na januari, na varios cuidad, a wordo para.
Segun e especialista di pulmon y scientifico Margareth Dalcolmo di e instituto nacional di biomedico Fiocruz, Brazil tin un capacidad pa vacuna un miyon persona mes pa dia, pero mester di suficiente vacuna.
Bolsonaro ta keda confia mas den otro metodonan alternativo. Epresidente y su ministro di salubridad Eduardo Pazuello, un general sin conocimento medico, te ainda ta propagangda Chloroquine, cual tratamento medico a resulta di no ta yuda e pashentnan di Corona.
Recientemente Bolsonaro tin mas interes den un spray di nanishi cu Israel ta haciendo experimento cu ne. Weekend pasa un delegacion di Brazil a bay Tel Aviv pa papia tocante e spray aki, pa Brazil. E spray di nanishi aki ainda ta den e fase di experimento. Tambe e gobierno di Bolsonaro a cumpra 20 miyon vacuna for di India Covaxin, pero ainda no a wordo aproba na Brazil.
Segun expertonan, medidanan severo y lockdown mester bin pa por yuda baha e contagio. “Ta pa via di ignorancia of falta di un plan di gobierno”. cu awe Brazil ta conta cu 2 mil morto pa dia y tambe cu un sistema di salubridad cu ta casi collaps”.
E micro biologo, Natalia Mortasternak diasabra a skirbi den corant ,,Mientras e expertonan di Covid-19 ta mustrando e resto di mundo e caminda pa cana, na Brazil nan ta keda riba e contradicionnan falso entre economia y salud. Na Brazil masha poco tin of ta cumpli cu Lockdown. E presidente di pais mes ta contra lockdown y esaki ta trece hopi duda y ta trece division den e pueblo. Na algun cuidad mas afecta, manera São Paulo y Rio de Janeiro, recientemente a introduci algun medida por ehempel orario di cierre den sector di horeca y centro commercialnan. Tambe tin Toque de queda , pero cu hopi excepcion, cu no por papia di un lockdown real.
E gobernadornan y alcaldenan ta implementando e medidanan aki contra gusto di e presidente, nan ta wordo confronta cu hopi problema, resistencia di e comerciantenan y e pueblo.
Pa tur e motibonan aki e virus na Brazil tin tur oportunidad di sigui desaroya y crece, esaki ta incluyendo e variante P.1., cu ta uno mas pisa y mas contagioso. Pasobra e vacunacion ta canando mucho poco poco y esaki por haci e virus mas resistente y desaroya mas variante ainda.
E situacion di Covid na Brazil,i lo afecta e resto di mundo tambe. World Health Organization (WHO) ta bin ta avisando ” SI Brazil no cuminsa tuma covid-19 na serio y cuminsa ataca e problema aki, e cantidad di morto y contagio lo sigui aumenta,.” E no lo afecta solamente Brazil, pero lo afecta e paisnan den becindario tambe” esaki segun e Director di W.H.O., Tedros Ghebreyesus.