Diabierna 12 di maart mainta, Prome Minister Evelyn Wever-Croes a bishita Scol Basico St Francuscus College den cuadro di Himno y Bandera. Manera ta costumber di Prome Minister desde cu el a drenta Parlamento, e ta bishita scolnan riba dianan di celebracionnan nacional pa mira con e scolnan ta preparando pa e bunita celebracionnan di nos pais.
Manera ta conoci, e bishitanan aki no ta bay na manera mescos cu antes sino ta tene cuenta cu reglanan di Corona virus. Sinembargo, Prome Minister a cuminsa haci su recoridonan na scol manteniendo su mes na e reglanan di tanto DVG como esunnan di cada scol.
“Nos mester bisa cu nos a keda sumamente impresiona di e manera cu St Francuscus College a prepara pa e celebracion di Himno y Bandera. E clasnan ta hopi anima y ta hopi informa y na altura di significacion nos himno, bandera y escudo. E juffrouwnan a haci un bunita trabou den informa nos muchanan. Nos a mira tambe e proyectonan di Klas 6 cu nan ta trahando di calamidadnan natural. Hopi bunita. Mi ta sumamente contento di mira con prepara nan ta pa dia di Himno y Bandera. Pabien Aruba riba dia di Himno y Bandera. Pabien docentenan, personal, mayornan y tur alumno di St Francuscus College”, Prome Minister a expresa cu orguyo
