ORANJESTAD – Awe merdia te den oranan di atardi, Corte den Promer Instancia a trata e caso penal cu Ministerio Publico a cuminsa contra e homber W. (63), kende ta wordo acusa di a mishi cu 4 mucha homber menor di 16 aña y a purba di mishi cu un otro mucha homber.
Aruba Native por a compronde cu tres mama cu nan yiu cu a wordo mishi door di W. tabata presente den Corte.
E lamentable incidentenan aki lo a sosode na Pieter Boer School den e periodo di 1 Januari 2018 y 13 Februari 2020.
Hues a mustra cu e muchanan a bisa cu tempo nan tabata den 4de klas, W. lo a bisa cu e lo tene relacion sexual cun’e y cu el a haci’e cu mas mucha. E tabata pasa man na e muchanan nan man y massage nan nek. Tur e muchanan aki a conta nan mama kico W. a bisa nan. Tin un di e muchanan a hasta graba den pause kico W. a bis’e. Na Polis W. a bisa di a haci expresion: I’ll squeeze the jelly out of it” na un mucha y cu e tabata fout.
Hues a resumi cu W. a declara cu e acusacion di expresionnan cu el a haci di lo tene relacion sexual cu e muchanan no ta berdad. El a bisa cu el a expresa cu e muchanan di nan organo sexual, pero esaki mas bien tabata tenta nan cu nan tin organo sexual chikito. El a admiti di lo a mishi cu e muchanan. Segun W. no tabatin intension sexual. El a bisa cu e tabata massage e muchanan cu ta sinti dolor na nan nek y schouder. El a bisa cu e sa haci massage di sport. El a admiti di a kiniki y dal un di e muchanan cu un faha pero un faha chikito. Tambe el a admiti di a trek e mucha na su orea y a dal’e na su cara.
W. a expresa disculpa na tur e mamanan presente den Corte pa loke a sosode. El a bisa cu ningun momento e tabatin intension di tin relacion sexual cu e muchanan. El a bisa cu el a mishi cu e muchanan pero no cu intension malo.
Fiscal a bisa Hues cu W. durante interogacion cada vez e tabata desmenti pero ora a confront’e cu grabacion, el a admiti e asunto ey so. Fiscal ta haya cu e declaracion di e muchanan ta convicente.
Fiscal a bisa Hues cu muchanan cu ta bay school no por wordo exponi na expresionnan cu W. a haci y tampoco dal. Fiscal ta haya cu W. a descualifica pa traha cu mucha. E ta haya cu W. mester keda leu pa traha na schoolnan di muchanan menor di edad.
Fiscal a exigi 10 luna di prison, di cual 5 luna ta condicional cu 3 aña di prueba. Fiscal a pone como condicional special cu W. mester cay bou guia di Reclasering. Tambe pa saca W. pa traha na cualkier school di menor di edad. Dia 1 April 2021 lo tin sentencia.