Curpa sin bida haya dialuna den e riu Seine na Paris ta di Alisha, un Hobencita di 14 aña, kende a wordo mata pa su ex guy y e chick nobo di e guy, ambos apenas 15 aña.
Paris, Francia: E sucedido tristo aki a tuma luga na Argenteuil, un bario Noordwest di Paris. E ex guy di Alisha (15) a pidi Alisha (14) pa nan topa canto di e riu Seine. Alisha sin sa a acepta e invitacion aki.
Durante un conferencia di prensa e fiscal Eric Corbaux a informa prensa, cu ora e ex guy a mira Alisha, e la bay riba dje, a dal’e y Alisha a cay riba vloer. Despues e la keda golpi’e y scop’e, sin piedad. Alisha a keda na tino, pero e golpinan tabata hopi fuerte cu e no por a move su curpa mas. E chick nobo di e guy cu tambe tabata na e sitio a yuda e guy benta Alisha den e riu. Ora nan a caba, nan a bay come algo den centro di Paris y despues a bay cas.
E mucha homber ora e la yega cas, e la conta su mama kiko nan a caba di haci. E mama a spanta y mesora a bay mira na canto di e riu y eynan e mama a bin topa cu un handschoen cu un boshi cabey, mesora e mama a bati alarma. Den careda di 8’or y 45 di anochi polis a logra saca e curpa di Alisha, e la wordo haya den awa unda cu ta mas o menos 1 meter hundo.
Segun e fiscal, e dos hobennan mesora a keda deteni, tambe e la sigui informa prensa cu Alisha tabata na tino y su wowonan tabata habri na momento cu e la wordo tira den awa, pero door di e golpinan fuerte e no por a move mas. E dos hobennan ta deteni y lo por haya un castigo di prison di 20 aña.
Segun e fiscal, Alisha tabata tin fracturanan na su cabes, cara y lomba, pero esey no ta e causa di su morto. ” E la fayece di hogamento”.
E crimen aki tin di haber cu un puppy love cu a bay completamente fout, sigui pa un cantidad di bullying. Alisha y su asesino, na februari ultimo tabata guy cu chick di otro. Pero esaki a caba hopi lihe. Despues di esaki, e snapchat-account di Alisha a wordo gehack pa e ex guy y su chick nobo. Nan a manda potret di Alisha su snapchat rond pa otro alumnonan den su klas, e potretnan tabata di Alisha den su paña interior.
Diasabra awo e muchanan di su scol ta organisa un marcha silencioso na su honor y diadomingo e mayornan di Alisha ta tene un marcha pa recorda nan yiu muhe cu inocentemente y inhustamente a wordo asesina.
