Riba un diabierna, 13 di maart, 2020, Gobierno Aruba a afirma cu Corona Virus a drenta Aruba. Algo cu sigur tawata inevitable pa tanto nos pais como pa mundo henter. Cu entrada di Covid Aruba a conoce un desaroyo nobo, un crisis nobo pa nos pais, un crisis sin precendencia. Gobierno di Aruba mester a tuma medidanan di precuacion riba salud y tambe pa mantene nos pueblo bon informa y protegi y contene e virus miho cu tawata por. Nos pueblo a sa di coopera pa asina e virus no plama y bira mas devastador.
Awe, nos ta mira tras riba un aña cu nos pueblo ta den e pandemia aki. Un aña cu mundo henter a realisa cu e normal cu nos tawata conoce a wordo altera dia pa dia. Un aña di frustracion, dolor, perdida di entrada y tristeza pa hopi famia cu a perde nan ser keri na e virus aki. Un tristesa cu nos pueblo a sinti cu cada ciudadano di nos pais cu a fayece. Tambe, un aña na unda nos pueblo a uni den solidaridad pa brinda yudansa na esnan cu mas tawata tin mester.
Gobierno di Aruba, riba e fecha aki, ta organisa un acto di conmemoracion especialmente pa recorda tur esnan cu a fayece cu e virus. Despues di esaki, lo sigui un programa special di informacion y oracion pa recorda un aña di Covid na Aruba. ‘Pa nos recupera, nos mester sigui recorda’. Esaki lo wordo pasa live via Facebook di Gabinete Wever-Croes y na nos canalnan di television. Sintonisa e programa special aki diasabra 13 di maart, 2021 for di 6or di atardi.
Durante henter dia, banderanan di Aruba lo ta na halfstok y Gobierno di Aruba ta invita pueblo di Aruba pa e dia aki, laga e bandera di nos Aruba dushi tera bula na halfstok como muestra di aprecio y sosten na famianan cu a pasa door di e tristesa aki y conmemora esnan cu a perde e bataya.
