ORANJESTAD – Awe Hues di Corte den Promer Instancia a dicta sentencia den e caso sumario cu e sindicatonan VWI y SIWA a cuminsa contra WEB.
Aruba Native por a compronde cu e caso sumario ta pasobra e sindicatonan ta contra cu WEB, a dicidi di sigui cu e reduccion di salario di 12,6 % e aña aki tambe. E sindicatonan ta haya cu WEB no por haci esaki y cu e trahadornan mester haya 100 % di salario paga.
Hues ta mustra cu segun ley di Aruba, ta limita pa cambia acuerdo di trabao entre partidonan, di un banda so. Hues ta mustra cu el a usa e criteria di Corte Supremo di Juli 2008, caminda ta mustra cu circumstancianan por pone cu por haci cambio den acuerdo.
Ta un hecho cu Aruba, door di e pandemia Covid 19, ta den un situacion financiero y economico malisimo. E situacion actual y pronosticonan ta mustra mas malo cu Mei 2020 ora cu e partidonan a bay di acuerdo pa un reduccion di 12,6 % te cu December 2020.
Hues ta mustra cu e situacion a bira mas malo te cu Gobierno, a base di articulo 36 di Statuut di Reino Hulandes, a pidi ayudo financiero di Hulanda. Entre April 2020 y Februari 2021, Aruba a fia 727 Miyon Florin y esaki sin inclui e miyonnan cu a inverti den ayudo humanitario den forma di paketenan di cuminda.
TURISMO 30 %
E unico pilar economico di Aruba, turismo, ta draai riba un por medio di 30 %. Door di e pandemia, e ayudo di cuminda cu Fundacion Pa Nos Comunidad ta duna, a subi di 200 famia pa casi 4500 famia pa luna. Cruz Cora a yuda mas di 8 mil famia. En total, mas di 2500 empresa ta hayando ayudo financiero y mas cu 25 mil trahador na Aruba ta hayando subsidio di salario.
11 MIL HENDE SIN TRABAO
Door di e pandemia di Covid 19, casi 11 mil hende a perde nan trabao y ta haya ayudo di FASE cu un salario di 950 florin pa luna. Ta calcula cu e cantidad di hendenan sin trabou ta bay subi mas.
Bao di e circumstancianan aki, ta di compronde cu Gobierno no tabatin otro salida cu busca ayudo finaciero di Hulanda y accepta e condicionnan cu Hulanda a pone.
WEB MESTER TA SOLIDARIO
Hues ta mustra cu mirando e situacion, WEB no tabatin otro escogencia cu informa e sindicatonan cu e reduccion di 12,6% ta sigui den 2021. Hues ta haya cu mirando e monopolio cu WEB tin na Aruba, WEB mester aporta na e interes general. Contrario cu e trahadornan di sector priva, e chens cu e trahadornan den servicio di Gobierno ta perde nan trabao ta hopi chikito.
Cu e pensamento aki, Hues ta haya cu ta mas cu husto cu e trahadornan di WEB ta keda solidario compara cu e trahadornan di sector priva.
Mirando e situacion economico di emergencia cu Aruba ta confrontando, door di e pandemia Covid 19 y e interes general, Hues ta haya cu e risico mester cay pa tanto WEB como e trahadornan .
Hues ta mustra cu e interes di e sindicatonan pa paga salario 100 % no ta pisa mas cu e interes di WEB pa mantene e reduccion di 12,5 di salarionan di trahadornan.
DECISION
Hues su decision ta cu e ta rechaza e demanda di e sindicatonan.
|
ReplyForward
|