Maart 08, 2021: Tropic Alé y su ditribuidor na Aruba, Compra Ltd a lansa diabierna ultimo nan proyecto, Fruta Escolar. Desde luna di Maart y te cu fin di aña escolar tur mucha di kleuter na Aruba lo ricibi un fruta gratis ariba tur diabierna.
Esaki ta un iniciativa di director di Compra Ltd, Sr. Hubert Dirks, inspira pa proyectonan similar na Europa y cu e meta pa siña y custuma muchanan desde jong e importancia di come fruta como parti di un dieta balansa.
Riba e prome dia 3477 mucha di kleuter y nan docent a ricibi bacoba di Tropic Alé gratis y danki na e cooperación di docentenan cu a crea entusiasmo pa cu e prome entregra di fruta, por a mira alegria di e muchanan ora nan a ricibi nan prome fruta. Bacoba tin un balor nutricional halto y ta un snack saludabel. E ta un fuente excelente di potasio y vitamina B6, fibra y carbohidrato y tin te hasta vitamina C. Muchanan lo ricibi otro fruta tambe durante transcurso di e proyecto.
Pa crea mas entusiasmo pa e proyecto tin tambe un concurso di pintamento pa mucha di 4 te cu 12 aña. Mayornan hunto cu nan yiu por download e kleurplaatje riba e pagina di Facebook di Compra Ltd y participa pa gana paketenan saludabel familiar cu ta contene Fruta di Tropic Alé, lechi di Frisian Flag, Jasmin Rice di Riceland y Healthy Choice Soups. Mester entrega e pintura na Compra Ltd, Schotlandstraat #35. Ultimo dia pa participa ta July 9, 2021.
Compra Ltd y Tropic Alé kier a gradici Ministerio di Enseñansa, Minister Lampe, tur docente y staff di e scolnan participante pa nan cooperación, cu ta haci e proyecto aki posibel.
