Siman pasa diamars Parlamento a trata cambionan den e ley di LTU cu ta ‘Landsverordening Toelating en Uitzetting’ caminda e tres fraccionnan cu ta sostene gobierno, a bay di acuerdo cu e cambionan cu mester a wordo introduce riba exigencia di gobierno Hulandes.
Parlamentario Benny Sevinger di fraccion di AVP a mustra cu tratamento di e ley aki tabata algo cu mester a sosode lihe riba insistencia di Hulanda y caminda practicamente e ciudadano Arubiano, a wordo converti den ciudadano di segunda categoria.
“Siman pasa diamars parlamento a trata cambio den e ley di LTU caminda ta trata cuestion di permiso, cuestion di maneho di extranheria, personanan cu ta biba riba nos pais pa hopi aña caba cu tin un permiso y kico ta e maneho di gobierno pa loke ta trata esaki.
Parlamento den pura a pasa e cambio di ley di LTU, pa motibo cu Hulanda a pone presion riba gabinete Wever Croes y durante tratamento di e cambio aki, por a scucha e Minister di Husticia sr Bikker, riba pregunta y remarcanan di coelga Dowers, cu e tin un ley pa cambio di un LTU nobo, cu ta un joya di un ley y cu e ley nobo aki ta cla for di 2018 pero nunca el a trece Parlamento.
Pues Bikker no a bin cu e ley nobo pero el a bin c’un cambio si pa loke ta trata LTU y tin cu puntra di con Bikker no a bin cu e ley completo cu supuestamente el a traha di nobo pero si el a bin c’un cambio cu Hulanda a pone como condicion pa loke ta trata e Rijkswetnan y den e caso aki pa loke ta trata e Landspakket.
Gobierno a duna parlamento algun copia di e Landspakket pero no tin detaye ni pa Parlamento corda pa pueblo den liñanan grandi y si mira den e parti di ‘economisch hervorming’ ta para un parti cu ta bisa: “de landsverordening toelating en uitzetting/verwijdering LTUV, zal worden geimplementeerd zodat gezinsleden van uitgezonde Rijksambtenaren van rechstwege zal worden toegelaten ot het land Aruba” y aki por mira cu mientras cu Parlamento no a aproba e cambio ainda, ya caba Hulanda a pone e cambio aki oficial for di dia prome di februari.
Pues aki por mira cu Parlamento no tin nada di bisa mas, ya cu Hulanda a pone como un “feit” cu e cambio aki ta na vigor caba for di dia prome di februari mientras cu Parlamento di Aruba cu tin cu aproba e cambio aki, a reuni diamars 2 di maart.
Algun dia atras Secretario di Estado a reacciona riba un aanwijzing cu a duna e isla di Corsou, caminda segun e mandatario Hulandes, democracia tin cu prevalence anto ta mesun gobierno di e mandatario aki, ta impone un cambio di ley sin cu Parlamento di Aruba, caminda debatenan tin cu tuma luga y democracia ta wordo protegi, no tin nada di bisa mas.
Den e documento cu gobierno a entrega na parlamento riba e landspakket, Hulanda gewoon a pone un V na e cambio di ley aki di LTU, pues e ta afgehaakt y cu Parlamento no tin nada di bisa mas, cu solamente grita SI y pa colmo por a mira cantidad di miembro di e tres fraccionnan cu ta sostene gobierno, haci druk durante di e reunion aki, grita cu ta nan ta democracia pero na final tur mester, mester a grita si, ya cu nan no tin nada mas di bisa ya cu Hulanda a dicidi pa nan caba,” Parlamentario Benny Sevinger a declara.