Awe riba Dia Internacional di Hende Muhe nos mester refleha riba e desaroyo y progreso inmenso cu nos isla a logra riba tereno di igualdad di genero.
Siendo un hende muher, representando mi pueblo como parlamentario, realisando mi soñonan, mi ta sinti mi bendiciona di a lanta den un comunidad cu a brinda mi e oportunidad ey.
Empoderando e ser femenino
Lamentablemente esaki no ta e caso pa tur di nos. Pesey mes nos mester sigui pone enfasis riba Meta number 5 di Desaroyo Sostenibel di Nacionnan Uni. Un meta cu ta enfoca riba e igualdad di genero, empoderando nos sernan femenino.
E ta importante pa pasa e mensahe aki cada oportunidad cu nos haya. Ban sigui educa y siña nos mucha y hobennan cu igualdad den oportunidad ta algo cu nos tur merece.
#ChooseToChallenge
Como hende muhe mi tambe ta sostene e tema di e aña aki cu ta #ChooseToChallenge.
Pesey mes mi kier reta tur hende muhe pa: sostene y motiva otro, pa berdaderamente aporta na desaroyo y crecemento di otro hende muhe. Mas cu tur cos ban percura pa bira fuente di inspiracion pa futuro generacion.
Feliz Dia di Hende Muhe. Ban sinti nos mes orgoyuso di por celebra e hende muhe, e persona cu un curason fuerte y amor infinito.