Dialuna 8 di maart, nos ta celebra dia internacional di hende muhe. Nos como hende muhe a demostra di ta un ser resiliente den temponan dificil creando oportunidadnan pa temponan bon cu ta bin nos dilanti. E hende muhe tin e habilidad pa encurasha esnan cu ta depende di nos, nos yiunan, nos nietonan y di nos famia. Laga nos uza e habilidad aki pa ilumina e caminda pa mas y mas hende muhe pa asina nos crea un comunidad y futuro mas resiliente.
Gobierno di Aruba, riba e fecha aki, ta invita tur hende muhe na Aruba y comunidad en general pa sintonisa un programa special via nos canalnan di Television y pagina di Facebook di Gabinete Wever-Croes. E programa ta hiba como titulo, Hende Muhe, e ser resiliente. E crisis actual a pone nos resiliencia na prueba, pero sigur a resalta e forsa femenino. Y ta den e crisis aki, nos a conoce muhenan fuerte den nos comunidad cu a sobresali meimei di un pandemia mundial.
Den e programa nos lo scucha mas tocante di e trabounan grandi cu crisis team a eherce durante e pandemia. Nos lo haya consehonan di comerciantenan cu mester a bira creativo pa asina sigui brinda nan servicio na nos comunidad. Prome Minister lo conta di su maneho di e crisis di mas grandi di nos tempo. Minister di Finansa lo papia di e reto financiero cu un pandemia ta trece cu ne.
Un programa hopi bunita dedica na nos hende muhenan fuerte y resiliente. Gobierno di Aruba ta reconoce e progreso di hende muhe na Aruba den e ultimo añanan. Prome Minister Evelyn Wever-Croes ta desea tur hende muhe riba nos dushi Isla, un Feliz dia di Hende Muhe dialuna awo, 8 di maart.