Minister Andin Bikker a actualisa ley di admision y expulsion

Recientemente parlamento di Aruba, cu 12 voto na fabor, a aproba cambionan den ley proponi pa minister mr. Andin Bikker, pa adapta e ley di admision y expulsion, conoci como e Landsverordering Toelating en Uitzetting (LTU). E cambionan ta hopi tecnico y mas bien interno, mara na e proceduranan den otorgamento di permiso di estadia riba nos isla.

E ley di LTU pa nos isla a drenta na vigor desde aña 1986, ora Aruba a bira un pais autonomo den Reino Hulandes. Durante e añanan cu a sigui, a adapta e ley na diferente ocasion, dependiendo di circunstancianan nobo den nos pais, mara ma desaroyonan socioeconomico y laboral. Sinembargo, e ultimo biaha cu e adapt’e tabata na december 2018.

Awor, despues di 3 aña atrobe a dicidi di haci algun adaptacion atrobe. E ley cu a pasa e siman aki tin cambionan tecnico y a ancra e maneho pa cu e famianan di personanan cu ta bin Aruba den cuadro di sosten tecnico for di Hulanda y cu ta bin staciona aki den cuadro di nan funcion, por ehempel e personal di Gabinete di Gobernador, Representacion di Hulanda na Aruba (VNO), Recherche Samenwerkingsteam, Ministerio Publico y Corte Comun di Caribe Hulandes.

Gran mayoria di e leynan aki ta ancra den maneho caba, pero cu awo a formalisa den un ley oficial. Parlamento di Aruba, den su mayoria, a sostene e cambionan proponi pa minister Andin Bikker pa por facilita e forma di traha di DIMAS, promoviendo mas eficiencia.